聲稱爆保錡@ERROR大鑊 韓子亮曾因勒索男同志被判監26個月

ERROR成員保錡今年是非多多，年初被揭同IG女神沙律（張沛樂）拍拖，因而被前女友踢爆原來二人未分手，後來保錡開live用粗口鬧fans，被經理人花姐掟入雪櫃「反省」4個月。近排歌手韓子亮(TL）推出粗口新歌，聲稱曾經同保錡係朋友嘅TL指責對方不停借多年前演出時嘅「搶咪事件」抽水，尋日更加爆大鑊，聲稱「某組合成員涉嫌迷姦」、「已經有7個事主準備企出嚟」，又暗示保錡係「香港版吳亦凡小豬」。

保錡暫時未對事件有回應，不過翻查資料，韓子亮本身新聞多多，更曾經因為勒索男同志罪名成立，被法庭判入獄26個月。

原名梁家進嘅韓子亮，有報導指佢爸爸係江湖中人，「事業」重心喺佐敦一帶，韓子亮出世嗰年就因為犯事入獄，但係喺2021年逝世。TL喺訪問提到過父母關係唔好，初中就被送去宿舍入住。

21歲嗰年，準備出道嘅韓子亮同一名男同志發生性行為之後，向對方聲稱拍咗片，並且同朋友合謀藉此勒索25萬。韓子亮同朋友因此而被捕，最後法庭判佢地勒索罪成，TL被判入獄26個月。韓子亮聲稱當時因為周轉問題而出此下策，又話係對方侵犯佢在先。

TL受訪提到喺獄中曾經被欺凌，因此而要住單獨囚禁嘅保護倉。出獄後TL改名換性做韓梓亮（而家叫韓子亮）再次出道，並且用阿爸遺產部份錢自資做音樂，被稱為「更生歌手」。

2019年元朗721事件後，TL喺ig post出多條白衣人片段，疑似係喺眾人行動前近距離拍攝，又聲稱「大義滅親」、「uncle見到我麻煩打埋我」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！