【聽晚大結局】《殺手》 何遠東演技被嫌過於浮誇 網民:睇到好X尷尬
由黎耀祥、陳豪、李佳芯及龔嘉欣等人主演嘅無綫劇集《殺手》,口碑及收視不俗,第四周7天跨平台總收視有30.3點。劇中雖然有唔少演員嘅演技都備受讚賞,不過飾演Dino嘅何遠東就被網民略嫌演技過於浮誇。
自細就好有表演慾嘅何遠東,係演藝學院高材生,讀書期間多次獲得校內傑出演員獎。入行12年嘅何遠東,多年嚟演繹過無數配角角色,近年多次憑其精湛演技而成功入屋,例如劇集《巨輪》、《心理追兇Mind Hunter》、《降魔的》、《黃金有罪》及《十八年後的終極告白》,更憑《降魔的》龍貓一角獲提名最佳男配角。佢今次喺《殺手》飾演反派Dino,原本係殺手經理人,之後更成為主理人。不過佢嘅演技就被網民批評過於浮誇,仲話睇到都尷尬,留言話:「劇集″殺手″嗰位 ‘癲奴’演技真係超浮誇!」、「佢真系(係)又Over又Bad.」、「睇到好尷尬好辛苦」、「睇到好X尷尬」、「佢啲表情越做越over」及「呢個肥仔Dino真係麻麻 ,以前明明演技仲好d」等等。
劇集喺聽晚就播出大結局,劇情越嚟越緊張,唔少反派陸續登場及角色相繼死亡,令到唔少觀眾都非常期待劇中要角嘅下場。最新劇情就講到Dino(何遠東飾)成為Overbeck主理人後,為咗可以操控Overbeck,佢要脅查理(鄭子誠飾)交出SD卡,先後擄走查理老婆(孫慧雪飾)及聘用槍手(易宇航飾)狙擊佢。查理為咗查蘇菲亞(羅蘭飾)嘅死因,不惜收購廢車場搵線索。Dino隨即去廢車場埋伏及意圖毀滅證據,查理喺Zero(陳豪飾)及易蘭(龔嘉欣飾)嘅協助下成功脫險,除咗將Dino嘅殺手全滅之外,仲得到Dino講出殺蘇菲亞嘅錄音。另一方面,Cash同Zero復合,及計劃去英國生活。喺尾段,Parker(謝東閔飾)被工人發現殺人後嘅紀念品,於是亦將工人殺埋,完全表現到佢兇殘嘅一面。
劇集仲有兩集就大結局,想知閻武(黎耀祥飾)可唔可以成功幫小秉(林景程飾)報仇、邊位殺手會身陷險境及反派會有啲咩下場等等嘅話,大家千祈唔好錯過喇!