胡定欣姚子羚 再做契媽超驚喜!

胡杏兒宣布佗第3胎,一班「胡說八道會」姊妹昨日表現興奮,胡定欣直言很驚喜:「原來過去4個月佢佗住BB參加內地節目,其實同班姊妹暗地裏都感覺佢有啲孕味,因為記得之前佢佗BB時,身體有同樣嘅變化,原來真係,我哋又做契媽啦!」姚子羚則表示於前一日才獲悉喜訊:「佢可以佗住個肚去內地拍節目,仲要帶住個仔,冇諗過係咁勁,拎埋獎又咁專業,呢個胡杏兒點解可以咁強!係我哋呢班姊妹嘅典範,好難得可以兼顧家庭同事業,佗B工作唔容易,為理想做到咁多嘢,已經好完美。」黃智雯亦大讚好友是女超人!