胡杏兒作客內地綜藝節目大談事業及感情 提及10年前感情唔係佢想像中咁樣

今年41歲嘅胡杏兒，家庭事業兩得意，近年積極喺內地發展。日前佢接受《送一百位女孩回家4》節目訪問，期間大談踏入40歲之後事業嘅轉變及10年前嘅感情狀態。

喺節目中，胡杏兒除咗坦言話而家冇女一做，因為佢覺得好難，不過佢亦唔覺得自己一定要做女一，因為佢已經演過好多好乏味嘅女一，而家寧願演一啲有趣嘅女二或女三。如果而家要演老太婆，佢都覺得可以。另外，佢仲話2015年之後就再冇為無綫劇集，反而有拍電影及隔離台嘅劇集，仲話而家嘅體系已經唔同，唔會再好似無綫咁一日拍二十幾個鐘。

之後，杏兒話佢唔在意自己嘅年紀，亦唔怕衰老，唯一驚嘅就係時間越嚟越少，因為有咗小朋友之後，你每一日都會陪住佢做同樣嘅嘢，就會覺得時間過得好快。被主持問到：「你現在覺得是四十不惑嗎？」，佢就話而家比三十歲時更加穩，更平安嘅感覺。佢亦唔擔心《演員請就位2》後人氣減退，因為有家人嘅支持，同家人比其他都係一啲比較虛嘅嘢。佢亦坦言希望可以追求到一啲嘢，但歸根究底都係要得到愛，咁樣就已經可以支撐自己。

另外，主持人又問佢快唔快樂，佢就話十年前問佢呢個問題，佢可能會喊，因為嗰時心裡有好大嘅缺口。可能係喺工作上冇得到好大嘅認可，而愛情方面亦唔係自己想象中咁樣，當時佢可能也會喊，但而家唔會啦。

大家都知杏兒講緊嘅係同黃宗澤（Bosco）嘅戀情，佢哋於2005年合作拍攝劇集《我的野蠻奶奶》而撻著，7年來都非常低調，直到2011年，杏兒奪得視后後先公開戀情，但12年和平分手。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！