脹爆阿嬌吸金百萬 「英皇御准」肥落去 Mani為祖兒做媒:佢恨生BB

·3 分鐘文章
Mani直指於經理人生涯中,遇過不自愛的藝人,愛莫能助。
Mani直指於經理人生涯中,遇過不自愛的藝人,愛莫能助。

藝人鍾欣潼(阿嬌)為接拍新片增重逾20磅,其經理人霍汶希(Mani)大爆她肥人有肥福狂接Job,估計吸金7位數,最難得是「零彈鐘」,故特准繼續Keep Fat。Mani又指容祖兒未婚恨生B,嘆成名所累才嫁杏無期。

阿嬌恃靚橫行娛樂圈20年,為迎新挑戰演肥妹角色,食到嘔煉成巨躉、凸腩、冇頸的脹爆身形。網民哭喪女神崩壞之際,日前英皇「金牌經理人」Mani接受專訪時卻指「肥嬌」因肥得福:「其實接肥妹角色後,英皇係想秘密收埋佢一段長時間,等佢拍完變番靚嬌先出嚟見人,不過嗰部戲開拍延遲2、3個月,咁綜藝節目又好有誠意,公司唔想浪費呢幾個月時間,兼且外界讚肥嬌好可愛,所以先幫佢接咗4個live騷、3個廣告同晚會商演,另一部肥之前已接嘅電影都照開工。(電影公司OK?)所以佢最近咪瘦番囉,做番靚女。」據悉Job接Job的阿嬌,不足3個月已穩袋百萬元人民幣。

問到增肥後的阿嬌是否更多工作?Mani直認:「係呀,冇被人彈過鐘,工作多到接唔晒要推,肥嬌一直好有福氣,啲粉絲有增無減,同埋啲工作冇要求佢好瘦。」笑問阿嬌是否繼續肥下去?Mani笑說:「咁又唔得,拍嗰個肥妹角色時會再肥多少少,拍完大約年底,可以開始睇營養師減番,明年開Twins 20周年演唱會就會恢復原貌。」

擇偶條件:齊五官就得

阿嬌身形和荷包同步脹爆,其天后師姐容祖兒亦有名有利,現年屆40歲只欠好老公,問Mani可望祖兒早日出嫁?她指單身的祖兒有顆恨生B的心,更搞笑謂情場無「母女」:「筍盤我需要多啲,佢仲後生。」不過她有信心祖兒不會「攝灶罅」:「佢人夠真,咁多人鍾意佢,因為佢夠可愛,只係佢行到呢個(天后)位置,好多人都卻步。」又自爆曾介紹異性給祖兒:「佢鍾意有才華、有趣嘅,五官到齊就得,唔使靚仔。」而講到28年經理人生涯中,Mani直認遇過不少「傾嚟都嘥時間」的藝人,最深印象是與某藝人共苦但不能同甘:「我花咗最大嘅努力,由佢喺事業低潮期扶到變番高潮期,但諗唔到合作10年,佢一手將自己事業推冧晒。」

另外,Mani昨日與祖兒結伴探古巨基一家,祖兒首次見到基仔愛兒Kuson時表現興奮,和BB大玩擊掌,她在社交網甫合照外,還留言讚基仔:「舊地重遊,古巨基已搖身一變成為人父,而他亦是我見過全世界最廿四孝嘅爹哋,為了BB健康,他們夫妻閉關整整1年,放下工作足不出戶照顧兒子,亦是整整1年沒有見任何朋友,這種愛真是能人所不能,看到這位新手爸爸,彷彿終於找到這一輩子的意義,由衷替他開心。」