自家製作!五間手工意大利麵專門店合集

·4 分鐘文章

講到食西餐一定唔少得意大利麵!對意粉有少少要求嘅,相信都食得出手工意粉同普通包裝意粉嘅分別,通常手工意粉都係每日新鮮製造,口感會較煙韌,蛋味亦濃郁啲。唔好以為食手工意粉一定去要傳統意大利餐廳先食到,近年香港已經愈開愈多手工意粉小店,等大家用較平民價錢都享用到高質嘅意大利麵,一齊睇下有咩選擇先~

荔枝角親民之選 Up a Notch Homemade Pasta & Pizza 

位於文青集中地D2 Place嘅手工意粉及薄餅專門店,主打以意大利最幼滑嘅00號麵粉製作嘅意粉。餐廳由一班曾於港島區人氣餐廳任職逾10年嘅資深經驗廚師組成,大廚更曾於米芝蓮三星餐廳學藝,食物質素可媲美高級意大利餐廳,但價錢就相當親民!主角意粉分別有自家製闊麵同幼麵,前者口感煙韌啲,後者就更能吸收醬汁味道。招牌慢煮龍蝦配自家製闊麵嘅醬汁特意用龍蝦頭製作,龍蝦鮮味好突出,波士頓龍蝦先抽真空後慢煮,肉質鮮嫩。

荔枝角親民之選 Up a Notch Homemade Pasta & Pizza
荔枝角親民之選 Up a Notch Homemade Pasta & Pizza

香濃海膽意粉 Dough Kitchen

大坑係近年嘅美食集中地,原來呢度藏有一間咁有質素嘅手工意粉~個個都為咗招牌手工海膽意粉去朝聖,呢度嘅意粉比較粗同有咬口,質感有啲似煙韌啲嘅烏冬;海膽醬汁濃郁creamy,所以每條意粉都掛晒海膽汁!另外虎蝦配櫻花蝦扁麵都好有驚喜,虎蝦新鮮彈牙,而且蝦肉嘅鮮甜同酸甜嘅番茄搭配得好好,愈食愈開胃。

圖: JoyfullFoodstagram
圖: JoyfullFoodstagram

米芝蓮推介姊妹店 JEP by Involtini

鍾意食意粉嘅朋友一定對呢間餐廳唔陌生,上年10月於屯門開業時風頭簡直一時無兩,最高峰時期要早兩個月book位先食到!點解咁人氣?原來係獲得米芝蓮餐盤推介Involtini Italian Cuisine嘅姊妹店,同樣由任職米芝連三星餐廳嘅廚師Jack主理,意粉選用意大利00麵粉、意大利蛋黃、Semolina小麥粉製作。必試西西里小紅蝦手造意大利幼麵,比起常用嘅紅蝦更鮮甜,先將蝦肉燒煎香再壓出蝦汁,每食一啖意粉都食到蝦肉嘅甜味。

圖: Nei bb
圖: Nei bb

摩登復古風意粉店 Attic Handmade Pasta 

尖沙咀呢間手工意粉開咗幾個月,整體環境舒適,餐廳樓底高,以酒紅色及金色為主,摩登得嚟又帶有復古感覺。意大利麵條同樣每日新鮮即製,柔韌彈牙,而且大廚擅於配搭時令食材烹調,所以唔少菜式都好有驚喜。招牌菜都係海膽醬手打意粉,對比起坊間嘅海膽意粉,呢度加咗更多食材,醬汁先用日本海膽、麵豉同清酒煮成,最後再加上新鮮海膽同沖繩特產海葡萄,令到海膽味更濃,又可以增加口感同鮮味,最後加埋日本烏魚子增加鹹香感覺,味道好rich!

訂座同時訂餐優惠: [2位用] $1,094.8 精緻手工意大利麵2人套餐 (原價:$1,416.8)

摩登復古風意粉店 Attic Handmade Pasta
摩登復古風意粉店 Attic Handmade Pasta

觀塘工廈高質意粉 Pasta Zone

口碑唔錯嘅平民意大利菜,位於觀塘工廈,裝修好簡單,主打意大利麵及意式雲吞。但原來主廚來自意大利北部,希望將最地道嘅意大利麵以親民價帶入香港。除咗常見嘅意大利麵外,餐廳重有少見嘅Gnocchi薯糰粒、貓耳朵粉同扭紋粉等款式,如意大利手工長通粉配帕爾瑪火腿香草汁及5mm寬條麵配蕃茄汁豬肉丸等。全部意粉價錢都係$68或$75,呢個價錢咁高質素,性價比超高!食完重有空間嘅話,要試埋人氣甜品tiramisu,creamy得嚟又唔會太甜膩。

圖: happyduckling、sweety07
圖: happyduckling、sweety07

文: Yanica

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能