自家製鹹甜班戟配創意咖啡特調 元朗新開綠白主調咖啡店

OpenRice開飯喇
更新日期： ·3 分鐘文章

咖啡店繼續開，今次終於開到嚟新界區啦。元朗呢間新店主打精品咖啡同班戟，用自家烘焙咖啡豆沖調出多款特色飲品，班戟亦有唔同鹹甜口味選擇！加上裝修以墨綠色同白色為主，有室內同室外座位，坐喺吧枱前欣賞咖啡師手藝得，帶埋毛孩坐喺戶外吹下風亦得，得咗。

The Third
The Third

The Third位於元朗建德街，係西環Tuckshop by Social Club嘅第三間店，Menu貴精不貴多，主要可以分為咖啡、茶、班戟，最近仲會有嚟自網店Nameless But Familiar嘅S’more美式曲奇。

Banana Pancakes（$80）
Banana Pancakes（$80）

班戟即叫即製，Banana Pancakes係無得輸嘅朱古力加香蕉配搭，三層班戟上有香蕉片、核桃，再淋上Nutella榛果可可醬。班戟口感鬆軟得嚟帶少少煙韌，而且濕潤度啱啱好。加埋配料一齊食，口腔充滿香蕉同Nutella嘅甜香，核桃嘅香脆增加口感層次，整體甜而不膩。

Bacon & Egg Pancakes（$80）
Bacon & Egg Pancakes（$80）

班戟做早餐亦得，呢份Bacon & Egg Pancakes就以太陽蛋、煎煙肉、薯餅同楓糖漿做配料，太陽蛋嘅半熟蛋黃睇落已經好吸引，食落先品嘗到沾上楓糖漿班戟嘅微甜同薯餅嘅香脆，之後就係煙肉嘅鹹香同油香，鹹甜交織又幾過癮。

Ying Yang（$50）
Ying Yang（$50）

小店所有咖啡飲品都用自家烘焙嘅SOE咖啡豆，採訪當日就用緊一款中淺烘焙嘅非洲日曬豆，偏花香同果香。呢杯Ying Yang靈感嚟自香港茶餐廳嘅鴛鴦，以Earl Grey配Espresso，然後用冰搖咖啡（Shakerato）嘅方法搖出一層細緻嘅泡沫，亦令咖啡唔使加奶口感都夠柔滑。Earl Grey嘅佛手柑香氣帶出咖啡嘅果香，味道酸甜。

Night Fall（$50）
Night Fall（$50）

好似水墨畫咁嘅Night Fall就係IG-able嘅入門版Latte，Espresso加咗竹炭粉變成黑色，倒入牛奶當中形成黑白漸層，當中仲加入雲呢拿同蜜糖，令咖啡飲落甜味更突出，但又唔會完全蓋過咖啡香醇，最啱平時飲咖啡怕苦嘅朋友仔試下。美中不足係竹炭粉有啲沙沙口感。

Pink Lemonade（$45）
Pink Lemonade（$45）

除咗咖啡，小店亦有供應焙茶、大吉嶺茶等茶飲，而Pink Lemonade就以檸檬、紅桑子、黑加侖子同梳打水調配出天然嘅粉紅色，味道亦比一般Lemonade甜啲啲，加上氣泡口感，酸甜清爽。

自家製鹹甜班戟
自家製鹹甜班戟
裝修以墨綠色同白色為主
裝修以墨綠色同白色為主
元朗新開綠白主調咖啡店-The Third
元朗新開綠白主調咖啡店-The Third

The Third
地址：元朗建德街69號大福大廈地下1-B號舖




文、相：Cathy