自誇耍家 10秒標淚 姜麗文喊苦喊忽 向鍾嘉欣挑機

花旦鍾嘉欣向來喊功了得，不過新劇卻遇上姜麗文挑機！姜麗文於一場憂心囡囡病情的戲份中演到七情上面，還喊到梨花帶雨，自誇演情緒激動戲份最耍家，不出10秒流出眼淚。

鍾嘉欣、鄭嘉穎、馬國明孭飛的無綫新劇《星空下的仁醫》，播出一星期反應不俗，除了帶出病患個案及醫院上下面對的日常問題，當中更有催淚情節，加上手術鏡頭逼真，令觀眾甚為受落，大讚劇集夠寫實，故於內地影視網獲逾千名觀眾給予該劇最高評分。

即將播出的一個病患個案，由姜麗文飾演媽媽，淋雨抱住患病的囡囡到醫院求診，並由演外科醫生的嘉欣作檢查。面對喊戲耍家的嘉欣，姜麗文亦沒半點怯場，極速入戲喊到眼淚鼻水一齊來，在場的工作人員也被感動到鼻酸酸。姜麗文受訪時透露為角色向媽媽級朋友取經：「多咗了解媽媽同BB之間嘅愛同聯繫，所以演得好舒服。（要喺嘉欣面前喊有冇壓力？）我好少呢方面嘅壓力，反而好享受過程，尤其拍喊戲最舒服，可以話強項係情緒波動嘅戲份，10秒就喊得出。」首次與嘉欣演對手戲，她笑指爸爸秦沛曾與對方合作無間，故初次見面已很有親切感，寄望再次合作。

幾秒戲份拍幾粒鐘

相對於姜麗文，嘉欣卻輕鬆得多，只需負責檢查小演員身體，雖然該場戲份僅得幾秒鐘，但由於要遷就小演員，結果要拍攝幾小時，不過她沒有半點怨言，還母愛氾濫，不時逗對方玩，她說：「今次呢個小演員係我咁耐以嚟合作最細年紀嘅，因為本身都有兩個小朋友，所以演呢類戲時都自信啲同有耐性。」