與余詠童拍咀戲 鄧卓殷監場 郭子豪錫額了事

·2 分鐘文章
鄧卓殷被指往「探班」,睇實男友拍親熱戲。
鄧卓殷被指往「探班」,睇實男友拍親熱戲。

藝人郭子豪日前與前落選港姐余詠童拍攝微電影,原本二人有一場咀嘴戲,但子豪為免打翻女友鄧卓殷(Amber)的醋埕,加上對方在場「探班」,遂把咀戲變成錫額頭,錫到女友燶!

郭子豪與Amber拍拖2年,愛得如膠似漆,雖曾傳分手,都無損二人感情發展,恩愛如昔。去年曾有傳Amber因不想男友呷醋而辭演有咀戲的無綫劇《雙生陌生人》,原來子豪都同樣尊重女友。向來工作認真的他,與方紹聰、何廣沛一齊搞網上頻道,拍攝不少網上節目,當中他演出不同角色都會全力以赴,扮女人、阿婆,甚至演騎呢角色都No Problem,但日前竟出現「改劇本」情況!他與參選港姐入行的余詠童拍攝微電影《當男人Long-D時》,因不想女友呷醋而改劇本,將一場咀嘴戲變為錫額頭,即使相擁戲都點到即止,而拍攝期間,Amber更全程監場!

「互相尊重嚟嘅」

記者就此事致電子豪,他表示:「其實呢次拍微電影好開心,因為我哋用咗好多方法去打動一位好有才華嘅導演嚟幫手,我哋非常欣賞佢,當佢傳份稿畀我,我已經覺得好正,可以即刻拍,而拍嗰日都非常順利,只係有個小插曲,就係擔心『咀嘴』呢場戲,我覺得唔係咁好,就改咗錫額頭算啦,因為要尊重番我『老細』,即係我女友。」

提到Amber監場是否令他大感壓力?他即說:「唔好話監場,佢不嬲都好支持我哋嘅拍攝,佢嚟睇吓都好,唔使咁擔心,我拍嘅時候都開心啲,尊重嚟嘅。」

郭子豪與余詠童有得攬、有得錫……額頭!
郭子豪與余詠童有得攬、有得錫……額頭!
余詠童參選港姐入行,珍惜每個演出機會。
余詠童參選港姐入行,珍惜每個演出機會。