與張振朗「預支蜜月」 楊偲泳風騷拆彈 否認好事近

有「巨咪陳妍希」之稱的楊偲泳，與無綫小生張振朗拍拖幾年仍愛得癡纏，早前更孖住到意大利滑雪兼預支蜜月，期間網晒泳裝浸溫泉，不過昨日她出席宣傳活動時否認好事近，還辯稱男友只是剛巧在附近。

王丹妮、廖子妤、楊偲泳、何啟華（阿Dee）等昨日為賀歲電影《毒舌大狀》宣傳，期間齊齊試坐摩天輪轉大運，3位名花有主的女士分外風騷。

與張振朗相戀3年的偲泳，早前雙雙到意大利雪山滑雪，問到是否預支蜜月？她卻辯稱：「唔係啦！我去工作，因為出席布拉格電影節做開幕嘉賓，之後去意大利搵朋友。（振朗陪你去？）佢咁啱喺附近啫！」談到她網晒浸溫泉大露背泳衣照，但正面卻性感欠奉，她說：「我係走密實路線嘅。」更笑指票房若達8千萬，她不介意露背示人，廖子妤則笑指達7千萬已可以，王丹妮卻說：「咁如果票房100萬，我先露吓腳趾啦！」還建議阿Dee除褲慶功。

王丹妮身兼導遊

早前公開戀情的廖子妤被問到是否一身輕，她說：「反而更緊張，如果1、2年後分手咁點算？我哋係拍咗幾年拖，緣聚緣散，將來有咩事嘅話，大家都唔使咁緊張。」

至於王丹妮就透露老公羅孝勇早於半個月前已回港，故聖誕節與家人一行十多人到主題樂園歡度佳節，身兼導遊的她笑言很有滿足感。已與老公率先觀賞該片的她，坦言稍後會再買飛捧場，問到老公如何評價她的演出？她說：「我哋工作上面係分開，互相唔評論，咁就唔會有無謂嘅爭拗，一早約法三章咗！」