艾粒X農夫主持《大整蠱》 網民：《玩嘢王》好睇啲

由艾粒及農夫主持嘅無綫新綜藝節目《大整蠱》噚晚（19日）首播，淨係睇個節目名，大家都知道係同整蠱有關啦！節目今次實行玩遍全無綫藝人，而第一集被整蠱嘅藝人就有薛家燕、黃美棋、何遠東、同埋林盛斌（Bob）。想知網民對首集《大整蠱》有咩睇法，咁就快啲轆落去睇下啦！

《玩嘢王》好睇啲
過往無綫都有推出過整蠱節目，例如《愚樂I love U》、《玩嘢王》及《農夫小儀嬉》等等，節目嘅收視及口碑都不俗。而噚晚嘅《大整蠱》先有家燕姐被假老虎嚇，然後再有要講出口號「雪糕感謝祭，食完高過曾志偉」兼食wasabi雪糕嘅黃美琪及何遠東。最後當然係重頭戲，阿Bob被安排為一個「假」慈善騷嘅飛車項目做司儀，為求逼真節目組仲搵埋馮盈盈、謝嘉怡及陳楨怡等人做幫兇。期間Bob頂替陳楨怡，坐喺飾演「總理」嘅特技人旁邊進行飄移表演，佢仲被假扮着火暈喺地下嘅特技人嚇親。唔少網民睇完之後都話《玩嘢王》好睇啲，例如：「之前李思捷玩嘢王入面整蠱環節好睇好多囉」及「立刻翻睇玩野王bob果集，到而家都覺得好笑，李思捷係有料的！今次呢個唔好笑」等等。

輕輕鬆鬆半個鐘
睇得整蠱節目，當然係想好開心咁笑一餐啦！今次《大整蠱》內容尚算豐富，所以唔少網民都有讚節目好睇，紛紛留言話：「拍多啲呢類搞笑玩嘢節目，點都好過睇風水同煑食嘅。」、「放鬆心情去睇，唔駛做任何比較，開開心心，轉眼就做完，話之佢係咪演技，反正我好滿意。反轉頭講，如阿Bob一早知都做到呢個效果，我睇得仲開心，因佢真係做過手術，如係乜都唔知既情況下拍，咁刺激始終對佢唔好」、「好多人鐘意睇搞搞震.真係好好笑.不過好危險」及「呢場show都幾好睇。」等等。不過都有網民認為節目唔夠娛樂性同埋唔係「真·整蠱」，例如：「事先知，好悶」、「有啲失望，唔算好笑」及「唔夠放唔夠娛樂性」等等。

Bob好嘢
今次主角阿Bob先被飄移嚇到面容扭曲，之後「總理」嘅車冒煙，「總理」更着火變成火人。阿Bob除咗即時叫人報警同拎滅火筒，佢仲拉拍檔馮盈盈離開及用外套向「總理」身上撲火。唔少網民睇完都大讚佢，例如「Bob哥好男人!有guts 」、「Bob敬業到」、「真係抵呀bob做MC發達」及「睇到Bob好專業…但我個人覺得不應玩到咁大。因Bob心臟麻麻」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！