5大芋泥甜品推介 芋泥麻糬煎餅、爆焰手工芋泥西多

每次提起芋泥嘅甜品都會令各位甜品控一秒變心心眼~由早幾年開始興起嘅芋泥牛奶,到而家已經愈嚟愈多人用佢整甜品!今期介紹多款唔同嘅芋泥甜品畀大家,由傳統到創新嘅都有,各位芋泥控記得bookmark!

芋泥麻糬煎餅 泰小子 

呢排興食泰式煎餅,最常見都係香蕉朱古力或榛子醬等口味~不過屯門呢間泰式小食居然有芋泥麻糬煎餅,聽到都流晒口水!煎餅外皮煎得金黃酥脆,內餡加咗大量芋泥同麻糬,食落口外脆內軟,芋泥綿滑又香甜,芋頭香氣都好突出。而麻糬食落又有啲牛奶香同煙煙韌韌,一次過可以滿足芋泥控同麻糬控嘅願望!

圖: Sayesfood
圖: Sayesfood

綿滑手作芋泥 手作鮮芋站 

一間主打芋泥嘅茶飲同甜品店!必試招牌芋泥奶凍吐司,呢個吐司真係啖啖芋泥,食過嘅人都話一路食,啲芋泥多到爆晒出嚟,芋頭味好濃又唔會太甜,味道好自然。奶凍嘅奶味都好重,入口即溶,同芋泥完美結合。手作芋泥芋圓鮮奶都係必飲,芋泥份量多,甜度剛剛好,底部有好多又軟又煙靭嘅小丸子,難怪咁受歡迎。

圖: chihuocouple
圖: chihuocouple

髒髒芋泥鹹蛋黃蛋餅 臺北棧

中環主打新派台灣菜嘅餐廳,呢個髒髒鹹蛋黃芋泥蛋餅係人氣菜式之一,首先蛋餅堅持使用鴨蛋製成,蛋香會比普通雞蛋更濃,餡料係滿滿嘅芋泥,選用台灣芋頭,上層加埋紫薯粉、鹹蛋黃碎同煉奶,甜而不膩,無論視覺定味道都好吸引,啱晒相機食先。

手工芋泥西多士 Will's Coffee

西多士本身已經夠邪惡,加埋芋泥可以有幾好食?呢個手工芋泥西多士即叫即煎,一份有六件,細細件啱啱好一啖一粒。中間係滿滿芋泥,質感細滑,味道唔會假甜,幼滑內餡配埋香脆方包真係好夾。另外仲可以加埋煉奶又多一份滋味!

圖: Voracious
圖: Voracious

大甲芋泥卷 鳥山。商號

由幾位旅遊Blogger開設嘅cafe,甜品每日新鮮製作而且係低糖配方,咁就食得開心又放心。台式大甲芋泥卷選用台灣著名大甲芋頭製作,芋泥香氣會特別濃厚。而且就咁整餡料已經要用三個鐘,好花功夫!綿滑嘅芋泥當中特別保留一部分芋頭原粒增加口感層次,微甜富芋頭天然香氣。配搭鬆軟帶蛋香嘅蛋糕,加埋香甜富奶香嘅忌廉真係好match!

圖: FeivouriteFood
圖: FeivouriteFood

文: Yanica

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能