荃灣新開新派豆乳主題店 年輕老闆出身豆品家族 悠閒嘆7.6特濃豆乳

·4 分鐘文章

豆類製品如豆花、豆漿等傳統甜品,功夫多但又賣得平,生意難做,所以而家愈嚟愈少豆品店了。難得仲有個後生仔對豆品有深厚嘅感情,唔止創立新派豆乳主題店,研製多款mix and match產品,就連機器都自己設計,希望可以將豆品業傳承落去。

餐廳創辦人,阿瑋
餐廳創辦人,阿瑋

阿瑋出身於豆品家族,婆婆同父母都係做豆品有關嘅工作,佢自細就睇住屋企人磨豆、做豆漿、豆腐,當然佢都要幫手啦。但細個時覺得磨豆等工作好悶,估都估唔到,大個咗嘅佢,居然會自己開咗間豆乳店,最近更擴充副線,喺荃灣同觀塘開設新派豆乳主題店。

豆乳每日新鮮於店內即製
豆乳每日新鮮於店內即製

新店主打多款微糖或少糖嘅豆乳飲品同雪糕,絕不添加防腐劑,另外亦有啲小食供應。4大招牌系列包括7.6特濃豆乳、豆乳茶、香濃豆乳雪糕同狂人豆花,都係喺傳統嘅基礎上,加上創新嘅配搭。例如將芋泥、紅豆、黑白芝麻等健康元素加入豆乳中,而且用料一啲都唔吝嗇,比起巿面上嘅豆漿,用多咗成倍嘅豆量呢!

7.6特濃豆乳系列:(左起)鮮芋泥豆乳、可可豆乳、招牌 7.6 特濃豆乳、桃膠豆乳
7.6特濃豆乳系列:(左起)鮮芋泥豆乳、可可豆乳、招牌 7.6 特濃豆乳、桃膠豆乳

招牌 7.6 特濃豆乳採用非基因改造黃豆,每日新鮮即製,飲落豆味甚為香濃,而且非常creamy同順滑。想有多少少飽肚感嘅可選芋泥豆乳,甜度適中;想要有多少少口感嚼口嘅,可選桃膠豆乳。全部豆乳都用類似酒樽嘅透明樽裝住,除咗美觀考慮之外,阿瑋話原意係想大家「飲一杯美酒消愁,倒不如喝一杯豆乳奮鬥」。

豆乳茶系列:(左起) 抹茶紅豆小丸子、焙茶珍珠小丸子
豆乳茶系列:(左起) 抹茶紅豆小丸子、焙茶珍珠小丸子

豆乳茶系列則有抹茶紅豆小丸子同焙茶珍珠小丸子等選擇,其中嘅抹茶粉同焙茶粉都係由日本直送,茶味香濃,小丸子口感煙韌,配搭得宜。

特濃豆乳雪糕
特濃豆乳雪糕

特濃豆乳雪糕仲誇張,用上 12 度豆乳製作,質感更為厚身,啖啖都係濃濃嘅豆香。有糯米糍紅豆雪糕、蕨餅雪糕、白玉雪糕等供應,但如果想食返最原始嘅豆味,當然就要揀原味啦。

(左)三色芋圓豆花、(右)煙韌之選
(左)三色芋圓豆花、(右)煙韌之選

豆花系列同三色芋圓分別有 10 同6款選擇。推介煙韌控必選三色芋圓豆花或者煙韌之選,前者豆花香滑,芋圓Q彈;後者則包括有珍珠、豆乳布丁、小丸子同芋圓,超多料得嚟仲啖啖有嚼勁。

牛油果鰻魚玉子粢飯
牛油果鰻魚玉子粢飯

豆漿通常都會配粢飯,做得豆乳店當然亦有粢飯供應啦。呢度有款粢飯同豆乳一樣,都係咁有創意,捨棄傳統嘅油炸鬼同肉鬆,換上牛油果、鰻魚同玉子,口感又幾豐富。

不過阿瑋嘅革新,最初都為屋企人帶嚟衝擊:「佢哋嗰輩思想較愛穩定,或較傳統,唔太想改變一直以嚟嘅方法或產品,咁唔係唔好,但我個人怕悶,就成日將豆漿、豆腐花調來調去,加入唔同元素試下。」不過起初屋企人唔太認同,阿瑋只可以每晚等佢哋收舖後,靜靜雞返舖頭研究自己嘅「新產品」,直至有咗自己嘅店,終於可以賣到自己想賣嘅嘢,客人嘅反應都唔錯,屋企人亦慢慢開始對佢嘅新奇諗法多咗份欣賞。「我希望可以將新鮮感同健康感覺帶畀客人,亦希望可以將傳統、人哋覺得守舊嘅行業,帶畀大家年輕化嘅感覺。而家好多即場製造豆腐、豆漿嘅店舖愈來愈少,我希望可以傳承落去。」

SOYmart by 豆乳狂人
地址: 荃灣大河道100號海之戀商場2樓2036號舖

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能