雅虎香港新聞 荳子新開懷舊港式冰室！麵包每日新鮮出爐 打卡雪糕西多士
人氣Cafe荳子又開新店，不過今次唔賣甜品賣常餐？原來新店走懷舊港式冰室路線，由焗飯、炒麵、鐵板餐等應有盡有。裡面仲有自家餅房，全日都有新鮮出爐蛋撻麵包！另一推介係下午茶，連埋乾冰奉上嘅雪糕粒粒西多士視覺效果一流呀。
荳子冰室位於將軍澳，特別搵嚟本地插畫師angryangry幫佢哋繪製呢幅將軍澳地圖，食飯前可以同將軍或者唔同將軍澳地標影相打卡先。裝修亦糅合港式風格，例如窗花、水洗石紋等。但亦有新派元素，好似可以用手機落單，Menu圖文並茂又方便。
冰室常餐F（日式燒豬頸肉撈公仔麵）（$58 +$5轉蜜糖叉燒餐包）
去冰室又點少得常餐先？特別推介呢份日式燒豬頸肉撈公仔麵，爽口嘅豬頸肉，同鹹香嘅公仔麵真係無得輸嘅配搭，唔會太油又夠香口。常餐本身配丹麥多士，亦可以加$5轉較為少見嘅蜜糖叉燒餐包，粒粒叉燒相當香甜。配埋馬蘇里拉芝士火腿奄列或黑松露醬炒滑蛋，夠滿足。
荳子包（$11）
餐廳裡面有埋餅房，供應菠蘿包、豬仔包、墨西哥包等經典包點。比較特別嘅有呢款荳子包，印住店名「荳子」兩個大字，裡面係幼滑吉士同粒粒紅豆餡，甜味啱啱好唔會太膩，配杯奶茶或者咖啡當早餐或者下午茶都唔錯。
雪糕粒粒西多士（單點$30，下午茶餐$36送咖啡或茶）
記得把握時間相機食先！雲呢拿雪糕用加咗乾冰嘅玻璃杯上枱，唔單止有白煙增加視覺效果，亦令雪糕融得慢啲。而西多士好貼心咁切成一粒粒Bite Size，加埋花生醬夾心外脆內酥軟又有甜香，配埋雪糕一熱一冷口感更刺激呀。
馬交豬扒包（下午茶餐$36送咖啡或茶）
另一款熱賣下午茶係呢份馬交豬扒包，口感脆脆哋嘅豬仔包夾住大大塊豬扒同蕃茄，味道平衡之外，豬扒亦保留到肉汁唔會太乾。
黑牛（朱古力可樂新地）（$24）
特飲亦有好多選擇，由忌廉溝鮮奶到雪糕紅豆冰，仲有較為少見嘅手拍老薑煲檸樂同呢杯黑牛，即係朱古力雪糕加可樂！原來可樂嘅甜味同朱古力味又幾夾，加上氣泡感又甜又消暑。
荳子冰室
地址：將軍澳唐德街1號將軍澳廣場1樓1-005號舖
