「華為小公主」姚安娜勇闖娛樂圈 處女作MV妝容顯老與宮雪花撞樣？

有「華為小公主」之稱嘅姚安娜，係華為創始人任正非二千金，上週四（14日）佢趁23歲生日喺微博宣佈自己正式加入娛樂圈，留言話：「對於自己的一份特殊的生日禮物，未來同行，不負熱愛。」喺呢個時候，佢食住個勢推出首支單曲及MV《Back Fire》。

1998年出生嘅姚安娜（原名：姚思為），5歲已經學習鋼琴、書法、音樂和國畫；9歲開始熱愛芭蕾舞；15歲前往上海著名芭蕾舞教室接受準職業訓練，期間參演過唔少經典舞台劇，另外佢仲參加過唔少海外嘅芭蕾舞學校及舞團集訓，年紀輕輕嘅佢就已經成為英國皇家舞蹈學院（RAD）最高級別嘅獲得者。除咗精通舞藝之外，姚安娜嘅學業成績亦非常優異，佢係畢業於哈佛大學嘅高材生，不過畢業後佢冇幫手打理家族生意，而係選擇勇闖娛樂圈。

走韓風路線嘅《Back Fire》MV出街後，唔少網民都覺得麻麻地，紛紛留言大彈佢冇唱功及跳得好一般：「很一般，一抓一大把，只是她有個好爸爸」、「我真沒偏見，但是真難聽」、「不是吃這碗飯的料，有錢也不行，別勉強了」、「唱功和舞蹈都不行」及「我的天，完全沒有表現力」等等。除此之外，唔少網民仲話佢喺MV中表情僵硬及妝容勁顯老，當中更有網民話覺得自己好似睇緊宮雪花嘅MV。另外，亦有部份網民留言支持及叫佢加油，寫負評嘅人只係羨慕及妒忌佢。

雖然啱啱出道就被劣評如潮，不過姚安娜都好識做咁回應，喺微博留言：「《BackFire》，我人生中第一個音樂作品今天正式發布啦。作為一個新人，我深知自己還有許多需要學習的地方，大家鼓勵與批評的聲音都是幫助我更好成長的養分，我會繼續沉澱自己，呈現更好的作品💪」

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！