《萬千星輝頒獎典禮2020》蔡思貝封后被嫌未夠班 雙料視帝王浩信多謝老婆陳自瑤勁冷淡

一年一度嘅《萬千星輝頒獎典禮2020》噚晚（10日）已經圓滿結束，13個獎項都塵埃落定，大家最關心嘅視帝視后就由《踩過界II》王浩信及蔡思貝奪得。想知網民對頒獎典禮有咩感受？快啲轆落去睇啦！

現場氣氛欠奉
由於疫情嘅關係，頒獎典禮現場不設現場觀眾，場面相對冷清。噚晚大會司儀為鄭裕玲（Do姐）、陸浩明及馮盈盈，唔少網民認為氣氛好差及司儀帶唔起氣氛，紛紛留言話：「成場個氣氛好差，平時會搞下gag抽下水，Fyy可能俾ex單嘢影響 個人都不在狀態」、「司儀搵錯人, 帶唔起氣氛, 不如搵邦邦好過」、「好耐冇睇過咁垃圾既頒獎禮 犀利」、「氣氛好差，班演員好多都黑面/無表情」及「6號次次都問到好尷尬」等等。另外，喺宣布「飛躍進步女藝員」之前，Do姐要求馮盈盈喺11個候選人中foul一個，佢就揀咗傳不和嘅江嘉敏，仲話唔想嘥咗女配角名額，場面搞到有少少尷尬。

胡鴻鈞又再進化？
無綫搵嚟《聲夢傳奇》參賽者炎明熹、鍾柔美、詹天文及姚焯菲擔任「最受歡迎電視歌曲」頒獎嘉賓，結果由胡鴻鈞（Hubert）憑《降魔的2.0》插曲《凡人不懂愛》奪得。多次惹上整容疑雲嘅胡鴻鈞，噚晚個樣被唔少網民話又唔同咗，紛紛留言話：「胡鴻鈞6.0」、「胡鴻鈞整到個樣完全唔似佢」、「胡鴻鈞個樣又進化」、「又整咗形?」及「胡鴻鈞變到女人咁既.....」等等。

蔣家旻／賴慰玲實至名歸
「飛躍進步女藝員」及「最佳女配角」競爭頗為激烈，最終分別由蔣家旻及賴慰玲大熱奪得，唔少網民都認為佢哋實至名歸，紛紛留言話：「咁係做得好喎水姐」、「恭喜水姐，捱出頭來，期待佢做女一」、「水姐真係好突破，抵拎」、「好開心賴慰玲攞到，由m club開始鍾意佢」、「女配角呢個無咩懸念」及「女配佢值得拎」等等。

戥徐榮唔抵
「最佳男配角」競爭非常激烈，最終由年尾《香港愛情故事》嘅白彪跑出，雖然白彪成功演活脾氣暴躁大男人，得到唔少觀眾讚賞，不過唔少網民戥徐榮唔抵，認為佢喺《反黑路人甲》社團大佬「喪鐘」演出非常精湛，紛紛留言話：「白彪正，但喪鐘有d慘」、「喪鐘今年撞到太多好對手，可惜可惜」、「白彪喺愛情故事都唔差，只係徐榮可惜」、「白彪係正既，喪鐘今年唔抵繼續加油」、「徐榮勁唔抵」及「徐榮真慘,雖然白彪都值」等等。

蔡思貝奪視后被嫌未夠班
入行7年嘅蔡思貝，噚晚成功擊敗視后大熱黃智雯及龔嘉欣，憑《踩過界II》趙正妹一角首次登上視后寶座，成為首位無綫90後最佳女主角。賽果公佈後，大部分網民似乎對結果唔太滿意，仲話黃智雯及龔嘉欣俾佢更有資格拎呢個獎，留言話：「點解係佢」、「造馬做到，垃圾」、「毫無公信力」、「進步大唔拎飛躍直接拎視后?佢邊夠資格啊 視后有提名已經好誇張」、「演技係有進步既，但攞主角就有點over了」、「5個是但一個都好過佢 佢有提名已經離譜」、「根本就未夠班，上得越高，跌得越痛」及「點睇都應該龔嘉欣啦，蔡思貝未夠班囉」。不過都有網民支持佢：「思貝演戲係有天份，演活角色」、「蔡思貝又真係演得唔錯」、「蔡思貝好過黃智雯拎」、「sisley choi 夠靚， 後生可塑性高」及「蔡思貝好野！」等等。

王浩信封視帝 陳自瑤竟然零反應
王浩信憑《踩過界II》盲俠一角勇奪「馬來西亞最喜愛TVB男主角」及「最佳男主角」，成為雙料視帝。喺講視帝得獎感受時，王浩信罕有多謝太太陳自瑤（Yoyo）照顧囡囡，不過喺鏡頭前Yoyo竟然毫無表情。事後更加引起網民熱烈討論，紛紛留言：「陳自瑤勁冷淡」、「Yoyo個表情咁既」、「佢老婆好唔比面佢，多謝佢都木口木面」、「Yoyo咩事個老公攞獎都燶口燶面」、「多謝yoyo，Yoyo個樣好冷淡」及「黑面YOYO 笑死」等等。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！