萬千星輝頒獎典禮2021｜ 譚俊彥林夏薇首奪視帝視后 鍾嘉欣大熱倒灶焫㷫網民

TVB年度盛事《萬千星輝頒獎典禮2021》噚晚（2日）已經圓滿結束，各個獎項都塵埃落定，大家最關心嘅視帝視后分別由譚俊彥以及林夏薇首度奪得。想知網民對頒獎典禮有咩感受？快啲轆落去睇啦！

序幕歌舞劇好尷尬
噚晚無綫安排一班新藝員員，例如游嘉欣、宋宛穎、關楓馨、郭柏妍及林正峰等等，以歌舞表演炒熱氣氛，其中仲有姜麗文唱陶大宇版本《倒轉地球》，雖然充滿新鮮感，不過網民就話睇到好尷尬，紛紛留言話「好難聽」、「好尷尬」、「仲慘過教會歌」、「邊間教會」、「嘴形都唔X啱」、「​​好似以前睇亞視咁」、「Tvb咩節目都有陣7味 唔知點解」及「每年愈搞好似愈無氣勢..」等等。

頒獎嘉賓陣容鼎盛
《萬千星輝頒獎典禮2021》搵嚟唔少大明星及大導演擔任嘉賓，好似有狄龍、秦沛、羅家英、劉江、盧海鵬、林建明、羅冠蘭、林保怡、及導演劉偉強等等，令人相當驚喜。唔少網民都話頒獎嘉賓陣容強勁，睇得出曾志偉落咗唔少功夫，留言話：「呢啲想請都請唔到啦，真係靠打人情牌」、「係得嘉賓陣容堅 但講嘢有啲尷」、「153嘅人情牌真係勁」、「志偉真係用盡人情牌」及「今年tvb吹大雞」等等。不過亦有網民認為頒獎嘉賓年紀太大，留言話：「今日頒獎嘉賓最後生既都五十歲 好多都係七老八十」、「今晚啲頒獎嘉賓加埋有冇成千歲？」、「以為去左老人院….」、「真。老人台」等等。

朱敏瀚奪最佳男配角被嫌未夠班
「最佳男配角」五強分別是張頴康、泰臣、朱敏瀚、羅子溢及黃子恆，最終由《換命真相》朱敏瀚成功跑出，不過唔少網民就認為佢未夠班，兼戥張頴康及泰臣唔抵，留言話：「要棒佢啊嘛」、「朱生擺明簽長約啦」、「邊輪到朱生呀」、「個人覺得張穎康好d 夠癲」、「憑咩呀 又玩格硬嚟塞獎力捧」、「竟然唔係泰臣」、「張穎康 秦臣兩個都慘」及「佢換命都冇發揮咁都有得拎」等等。

譚俊彥成為雙料視帝
大熱門譚俊彥憑《換命真相》勇奪「最佳男主角」及「馬來西亞最喜愛TVB男主角」，成為雙料視帝，雖然有網民認為佢未夠資格拎，不過唔少網民都認為佢係實至名歸，紛紛留言祝賀，例如「雙料冇得頂! 譚俊彥實至名歸!」、「恭喜shaun 實至名歸」、「今年淨係有睇換命真相 係幾好睇」、「正路，今年係咁谷佢」、「佢演技係現任男主算最好 真心 形象又好 公關又好 最重要聽話」、「Congrats Shaun 一早巳經睇好你 用心做戲觀眾睇到架 繼續加油」及「恭喜呀Shaun」等等。

TVB欠鍾嘉欣一個視后
今屆視后寶座終於揭盅，最終由林夏薇憑《七公主》爆冷奪視后，而鍾嘉欣只係奪得大馬視后。賽果一出，大批網民表示好嬲同好失望，紛紛留言鬧爆TVB及林夏薇，例如「呢個咁都有得拎 擺明靠關係啦」、「咁都唔俾鍾嘉欣​​」、「仲衰過上年蔡思貝」、「林夏薇都未夠班」、「呢五個排，點都唔會到林啦」、「做馬，還鍾嘉欣一個視后」、「開玩笑吧！還我鍾嘉欣」、「還鍾嘉欣一個視后」、「侮辱觀眾的結果」、「還我Linda視后」、「實在太唔公平，嘉欣做得咁好及唯一令我感動的角色，居然冇獎，嬲到即刻熄電視」、「真心灰, 鍾嘉欣啲演技已經熟成哂, 今年絕對最有資格, 唔係以前啲常在心lv」、「造馬都唔好造到咁喇！！TVB吔屎喇」、「造馬造到離哂地，明明應該係鍾嘉欣拎」及「超級勁失望！視后點解唔係Linda bb ?」等等。

《七公主》爆冷奪「最佳劇集」
除咗「最佳女主角」獎項備受爭議之外，「最佳劇集」嘅賽果同樣令人非常失望。《七公主》爆冷奪「最佳劇集」，唔少網民都認為《星空下的仁醫》比《七公主》更值得拎，紛紛留言表示不滿，例如「太造馬啦！完全冇公信力！」、「爛劇都拎獎」、「7公主憑咩拿最佳 令人失望」、「留言一面倒，賽果好明顯錯晒。。。錯得好離譜」、「絕頂荒謬的結果，令人極度失望」、「坐定定睇電視，但賽果令人十分失望」、「有乜理由唔係星空下的仁醫呢」、「離晒大譜 假到呢點可能係七公主」及「造馬造到離哂地，明明應該「星空下的仁醫」先有資格」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！