【萬千星輝2020】王浩信爭視帝有隱憂 同演技無關？譚俊彥成黑馬 甘草有望跑出

【萬千星輝頒獎典禮2020】今個星期日舉行，被稱為視帝嘅「最佳男主角」獎項，今年比較難以估計 — 因為最有話題最多人講嗰套，最重戲份嗰位竟然唔入圍！就係咁，成個局面變得勢均力敵。

《反黑路人甲》王浩信居然冇提名

今年話題之作《反黑路人甲》收視同口碑都有，飾演張細倫嘅王浩信由頭帶到尾，角色亦甚有發揮，但係最佳男主角名單上，佢居然唔係憑呢套劇入圍，而係以上次得獎作《踩過界》續集《踩過界II》獲提名，完全摸不著頭腦！

《踩過界》王浩信演失明律師有驚喜，但係以戲論戲始終《反黑路人甲》嘅張細倫突出好多，加上王浩信喺內地拍緊劇，因為檢疫隔離限制好大機會無法出席，進一步削弱二度封帝機會。

「細倫」讓路 造就張振朗上位？

《反黑路人甲》另一男主角張振朗劇中表現與王浩信不相伯仲，而且以呢套劇提名，贏面比起《使徒行者3》、《踩過界II》及《機場特警》更有說服力。而且張振朗原來都入行十年，公司幫手捧上位都不無道理。

林峯 馬國明 有冇機會？

多次入圍但係都食白果嘅林峯重返TVB拍《使徒行者3》，仲要排做台慶劇，睇落係為林峯封帝鋪路。但係觀乎外界反應聲勢稍遜，加上林峯只係以部頭形式合作，經理人仲係古天樂旗下公司，唔係親生仔機會自然打折扣。至於喺《使徒行者3》演奸角嘅上屆視帝馬明，表現其實比上年《白色強人》更好睇，冧莊機會唔低，但係可能要睇吓一旦得獎會唔會台上求婚囉。

最大黑馬︰譚俊彥

今年可以話係譚俊彥「爆發年」，之前幾套劇集可能仲係熱身狀態所以表現平平，但係《法證先鋒IV》食正疫情收視超好，而《十八年後的終極告白》嘅演出更被網友稱為「演技大爆發」，算係有加持。下年譚俊彥有2套劇排隊出，入TVB日子雖短，不過上位都係時候。

值得一提︰韋家雄／馬貫東／羅子溢

《木棘證人》撇除劇名令人摸不著頭腦之外，網友反應其實唔錯，戲中唔少演員嘅演出亦都幾好睇，當然最搶戲嘅一定係韋家雄。唔排除TVB複製「黎耀祥模式」日後安排韋家雄擔正兼且做視帝，以《木》試水溫反應幾正面。北上搵食一輪再拍港劇嘅羅子溢（羅仲謙）演出頗有驚喜，而且拍住韋家雄都幾有趣，可以考慮再下一城。

同樣係多年綠葉嘅馬貫東喺《那些我愛過的人》呢套「考牌」之作交足功課，視帝未係時候，但起碼奠定男二位置。

丹爺三哥不容忽視

正因為各路人馬都係爭少少，頒俾甘草前輩級就最服眾！三哥苗僑偉憑《使徒行者2》卓凱一角拎過大馬視帝，打低當時聲勢不相伯仲嘅陳展鵬（《同盟》）及王浩信（《踩過界》）。同一招會唔會再出現就要睇傾掂數未。丹爺劉丹話晒都係咁多輯《愛．回家》嘅骨幹人物，唔少集數都靠佢呢支「定海神針」撐住，而且上年林淑敏同周嘉洛都憑《愛．回家之開心速遞》得到最佳男女配角，處境劇由收視到獎項上都唔再係陪跑份子，丹爺攞視帝仲夠晒話題性，包保facebook洗版，點會冇可能？