葉童嫌老公阻碇:好需要分開

東方日報
·2 分鐘文章
葉童返璞歸真,享受平凡生活。
葉童返璞歸真,享受平凡生活。

影星葉童與丈夫陳國熹由拍拖到結婚數十年,至近年關係「有變」!葉童自爆疫情下工作量減少,夫妻相處時間變多,覺得失去私人空間:「好需要分一分開!」

金像影后葉童近日客串ViuTV新劇《無限斜棟有限公司》,同劇以新演員居多,她與混血美女盧慧敏飾演母女,個性極端的她不願與女兒來往。入行多年演過無數角色,葉童坦言被此角色考起:「我冇做過媽咪,對角色有啲懷疑,唔知點去演唔想同個女一齊嘅媽咪!我唔介意演媽咪,但捉唔到個感覺,點解可以完全唔想見個女?呢個係乜嘢感覺?冇信心演一個我唔了解嘅角色。」後來她跟導演分析後,決定一試。

「從前唔貼地」

劇中角色獨行獨斷,但她笑言真實的葉童是懶懶閒、拖泥帶水、常找藉口。但自從爆發疫症後,其生活從此改變,以前她覺得必須煲劇、睇戲,現在則愛上做家務、煮飯和運動:「疫情初期真係睇好多戲,但只係睇,好似冇做過任何嘢,咁多年累積睇咗咁多戲,我演技係咪好咗呢?我又唔覺特別好咗,忽然之間,唔好睇戲喇!早睡早起,做運動做家務。」

她發覺簡單生活更貼近大眾:「發覺從前唔係咁貼地,有一種憑感覺去揣摩角色,依家雖然平淡過日子,但有樂趣。」不過因留家時間多,開始想與老公保持距離,她說:「好需要分一分開,要小小空間,話題就可以討論多啲。(你包容佢多啲?)係佢包容我多啲,我唔係一個稱職家庭主婦,某程度上我係藝術家,藝術家梗係需要被包容,哈哈!兩個人一齊係互相體諒、包容。(你哋關係點?)關係OK,但大家都需要啲空間,疫情唔可以去街,佢又冇工返,大家喺同一個空間生活,但可能做唔同嘢,佢睇電視,我就入房睇書、打機。」

讚盧慧敏靚女

她笑言以前經常叫老公給予演戲意見,但現在已不想問:「依家我有啲反叛囉!寧願角色出咗嚟,佢睇完畀意見。」提到「囡囡」盧慧敏,葉童即讚不絕口:「佢好靚女,又高、腳又長。(似你入行時?)佢條件好好多!我哋出道嘅年代冇咁多競爭,依家競爭大啲、辛苦啲、多啲要求,如果我喺依家年代,未必出到嚟囉!」