蔡嘉欣為突出產品效果疑自製黑眼圈 網民鬧爆好假

以KOL身份參選2019年港姐嘅蔡嘉欣（Kayan），大熱倒灶後被TVB睇中簽約成為親生女，擔任節目主持及為劇集拍攝，演出機會比同屆港姐更多。不過蔡嘉欣喺入行後是非不斷，例如主持《姊妹淘》時搶鏡搶對白與其他主持不和、大晒名牌手袋及名牌車被指炫富又拜金、及買茶杯貴婦狗Mochi扮朋友送等等。是非未停過嘅佢最近為美容產品出宣傳片，片中佢為突出產品效果，而特登將自己黑眼圈加深，結果被網民鬧爆。

日前蔡嘉欣為美容產品出宣傳片，聲稱該產品可以20分鐘將黑眼圈擊退。影片一開始蔡嘉欣有一對超級黑嘅黑眼圈，並對住鏡頭話：「你哋睇下我個黑眼圈幾勁」，仲話早瞓同搽多層遮瑕膏都無用。之後佢開始介紹及使用呢款眼膜，將眼膜放喺右眼眼袋，經剪接到夠鐘後將眼膜撕去，當時佢嘅右眼嘅黑眼圈明顯淺咗好多，佢就好似好驚訝咁話：「嘩！個黑眼圈真係消失咗，好神奇呀！」

片中蔡嘉欣疑似將自己的眼袋位置搽黑，影片出街後唔少網民鬧爆佢，話好假、侮辱網民智慧及冇誠意等等，而現時佢已經將留言功能關閉。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！