蔡嘉欣被指買狗扮朋友送 遭網民圍罵「心機女」

27歲嘅蔡嘉欣2019年選港姐入行，當年5強止步後就成為無綫旗下藝人，繼早前喺Instagram大曬40萬現金，同經常曬名牌手袋及名牌車，又喺《姊妹淘》中自爆男友每年送5位數字支票作生日禮物，惹嚟拜金之名後，近日蔡嘉欣又再次捲入負面新聞，事緣佢上年11月養咗隻叫Mochi嘅茶杯貴婦狗，之後被質疑「買狗扮朋友送」。

蔡嘉欣曾經拍片介紹家中新成員Mochi，喺片中多次強調係朋友送：「今日去咗我朋友度接咗隻狗狗返嚟嘞，Mochi，佢上一手嘅爸爸已教識佢去廁所，佢好乖。」更解釋因為朋友隻狗生咗BB，而一直養開貓嘅佢，其實一直好想養狗，於是朋友就將狗送俾佢，更指養佢都係一個緣份。不過，有眼利嘅網民指控佢「買狗扮朋友送」：「隻啡色係佢，灰黑色係佢家姐，都係喺網店買，網友踢爆咗，佢講大話話隻狗係朋友畀，其實係買。」仲有唔少網民留言：「買狗就買狗啦，扮晒嘢咩朋友隻狗生咗BB問你要唔要。」、「你走去買狗，即係支持breeder（繁殖者）繼續當狗係生財工具。」、「買狗呀，領養定買㗎。唔使炫耀啦，如果係買嘅我就覺得好乞人憎囉！」等等。

有網民更指佢口中嘅朋友，其實係一間專門賣貴婦狗嘅網店老闆，網店專頁指該店係自家繁殖茶杯貴婦犬，幾乎每星期都有新狗推出。自稱「奶爸」嘅店主亦喺上年11月上載同蔡嘉欣同Mochi嘅合照，寫：「Thanks for coming. @ kayan.c」但蔡嘉欣一於少理，只回覆讚Mochi可愛嘅網民，未有回應被質疑買狗一事。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！