蔣家旻「被割席」否認追富家子

蔣家旻感情上絕不做主動。
蔣家旻感情上絕不做主動。

無綫小花蔣家旻傳背排舞師緋聞男友麥秋成,主動出擊暗溝年輕2歲的「富三代」鍾培生,可是「豪門之路」不易行,因男方劃清界線指她是普通朋友,而她亦否認女追男,又指對方「交遊廣闊」!

蔣家旻(Angel)去年學舞撻着年長10歲的麥秋成,但男方死不認愛,令她轉目標力追因錄影網上節目而認識的仁濟總理鍾培生,除請男方為她解決社交網被Hack的難題外,得知對方是動漫迷,又以「女主人」姿態陪他包場睇動畫電影,並Cosplay化身角色「蝴蝶忍」,落力投其所好!

昨日她首度以女主角身份,偕敖嘉年、張秀文、林秀怡及鄭俊弘等出席新劇《欺詐劇團》拜神儀式,問到女追男傳聞,她澄清:「係誤會,感情方面從來唔主動,包場睇戲係跟足工作程序,座位都係對方安排,同佢只係工作上見過兩次。」更斷言對方只是「相識嘅人」:「冇意思。(佢追你?)Feel唔到,佢交遊廣闊,我係佢其中一個識嘅藝人朋友。」

接完花球望靈驗

雖刻意劃清界線,但她直認有顆恨拍拖的心,談及在好姊妹岑杏賢婚禮上接到花球,她說:「佢好想我接到,想我幸福快樂,都希望會靈。(你接咗,湯洛雯會唔會嬲?)我本身想佢接,但佢覺得自己整個花球自己接番好怪,佢唔使接都一定會結婚嘅!」

至於鍾培生受訪時亦否認被追:「我同佢係普通朋友,佢做我個拳擊比賽節目第2集嘉賓,非常專業。(對佢印象點?)有睇過佢嘅劇。(所以搵佢做嘉賓?)唔關我事,係同事安排。(依家有冇拍拖?)有飲茶、食飯嘅朋友,私生活唔講啦!」

此外,出席拜神儀式的還有林秀怡,問是否「解凍」後首套劇?她說:「冇話封我,係咁啱啲劇唔啱我,對上一套劇係《唐人街》,都年幾前。」而重返無綫即任「男一」的敖嘉年,指劇情有少少踩界:「有啲色情,但唔會過電視尺度,係好笑嘅。」

敖嘉年「劇透」會有色情的情節。
敖嘉年「劇透」會有色情的情節。