蕭正楠做「愛的替身」 電眼冧湯洛雯

蕭正楠昨日受訪時大放笑彈，笑言拍劇期間化「先人妝」，又自爆用「馬國明眼神」冧拍檔湯洛雯！至於掌握男友行蹤的湯洛雯全程甜笑，大方表示等對方「收割」！

阿蕭、靚湯、簡淑兒及利穎怡等，昨日在電視城大玩遊戲，宣傳無綫劇《一笑渡凡間》。阿蕭今次演出可謂犧牲色相，被安排面部長滿紫色毒瘡、瞓山邊待救「出場」，播放時間僅1分鐘，卻拍足幾日，期間更不停「畀嘢咬」，他說：「嗰個妝之後會不停喺夢境出現，所以成日要化，每次兩個幾鐘。」靚湯大爆他索性「打橫瞓」上妝，似足先人化妝，阿蕭靦腆說：「冇再咁做啦！有時唔夠瞓，真係冇辦法喎！」

踩場幫手宣傳

劇中靚湯多以捕快造型登場，唯一女裝戲竟被笑「男扮女」，阿蕭說：「我嘅表情仲要有驚艷嘅感覺，用馬國明望住佢嘅眼神嚟演戲，流晒口水咁款！」靚湯「不滿」男友被拖落水，大發嬌嗔：「做乜我哋宣傳，成日講佢啫？」阿蕭笑言待馬國明有劇出，便會踩場贈興，靚湯即說：「咁啱喇！佢喺內地仲要留多成個月，下月《寶寶大過天》宣傳靠晒你。」馬國明已在內地逗留約1個月，更帶同靚湯的毛公仔同行，靚湯笑說：「佢已經據為己有，唔知有冇分屍呢？（幾時將你據為己有？）呢層要問吓佢喎！」

至於《東張西望》女神利穎怡客串慘遭毒害至半身不遂的丫鬟，僅得一句對白，只能靠眼神表達情緒，她感激監製王偉仁：「自從《迷網》後，佢繼續搵我拍劇，開始多咗劇集方面嘅工作，依家拍緊《痞子殿下》。（退出《東張西望》？）我梗係想兩邊兼顧。」而簡淑兒「變奸」挑戰演技，獲幕後工作人員大讚，有如打下強心針。