蕭正楠遭性騷擾 西裝友揸實唔放

阿蕭與陳瀅於無綫熱播劇《愛美麗狂想曲》內「性別互調」，「麻甩」陳瀅倒追「娘娘腔」的阿蕭，最後女方更求婚成功！談到今次化身「基男」，阿蕭自爆真的有段時間深受同性歡迎：「當時啱啱做模特兒，喺港鐵遇到個西裝斯文男人對住我笑，我以為識嘅，佢伸手同我握，我好自然咁配合，點知佢握住唔放，我扯唔甩，最後惟有大聲問佢咩事！」

他形容類似情形當時見怪不怪：「我入行時入過『男同志幻想榜』，記得當時言承旭已經蟬聯榜首好耐，竟然畀我超越，可能當時皮膚白，把聲又比較尖，後嚟我去咗北京，特登跟人學唱rock搞拆把聲。（唔驚以後唱唔到歌？）嗰時唱唔唱到有乜分別？都畀人『放逐』咗，足足3年，每年只得大半個月時間喺香港，完全感受到人生低潮，都有諗係咪應該轉行。」幸而何麗全將他引薦給樂易玲，最終令阿蕭「重生」，更有機會認識太太黃翠如。

而外表亮麗的「女神」陳瀅今次將「最真實的自己」呈現於觀眾眼前，結果卻被身邊人狂鬧：「抽離唔到，本來我性格已經麻甩，拍完係『麻甩X5』，朋友不停提點叫我收斂，但遇到咁好嘅機會，又同好似阿蕭咁嘅拍檔產生化學作用，我覺得好幸福。」戲內角色情路上相當「進取」，她坦言現實生活亦不介意反傳統：「遇到鍾意嘅，點解要怕主動呢？」

「麻甩女神」陳瀅缺安全感

她羨慕阿蕭於圈中覓得真愛，阿蕭卻說：「我好隨遇而安，當時大家拍完套劇隔咗一排，仲患得患失，就開始覺得可以試吓發展囉！」陳瀅接着說：「佢兩個嗰種sweet唔係刻意造出嚟嗰隻。（你都想搵個圈中男友？）真係有諗過，不過我份人好冇安全感，驚對方離開，如果佢拍親熱戲，我一定呷醋。」