薄餅控的選擇 手工薄餅才是王道

薄餅係唔少人嘅comfort food，薄餅店亦開至成行成巿，不過要搵有質素，仲要手工製嘅薄餅，都唔容易。今次介紹嘅兩間薄餅店，一間係有多年歷史嘅專門店，一間係新開嘅舖頭，但都係堅持手工製作嘅表表者。

Pizzeria Italia（西環）

主打手工意式薄餅嘅呢間專門店，喺1994年就開設咗第一間分店，餐牌上嘅菜式食譜製法，一直傳到今日都冇變過。大部分食材均由意大利入口，薄餅更係即叫即製，夠晒新鮮脆口。

Pizza Italia- margherita with mushroom, sausage, spicy salami and mix peppers

睇餐廳名就知呢度主打薄餅，每個薄餅都係使用意大利麵粉，全人手搓粉製作，高峰時一日可以賣到250個！放上餡料後，Pizza會放喺石板上以400度高溫烤焗，溫度比一般焗爐更勻循，餅底自然就更脆身。呢個招牌Pizza係薄批嚟，味道作濃，尤以辣肉腸辣味最為突出，配搭mozzarella芝士好香口。

Costine Di Maiale- slow cooked baby back ribs with home-made BBQ sauce, vegetables and fries

加入5種香料製作嘅豬肋骨，準備功夫都唔少，需要醃過夜，以220度高溫烤焗3個零鐘之後，淋埋自家製嘅燒烤醬，又要再焗多陣。師傅解釋兩次烤焗分別可以使豬肋骨肉質變得腍身，同埋令醬汁更加入味。自家製嘅燒烤醬帶有微微煙燻感，微辣微甜。

Lasagna de Carne- traditional baked layered pasta with US Angus beef filling, mozzarella and béchamel

4層嘅意大利千層闊麵，同樣都係選用意大利麵粉製作。 芝士都用咗3種，包括有mozzarella、巴馬臣等，所以既能做到拉絲效果，同時亦可以食得到濃濃嘅芝士鹹香味。特別要提一提，食到中間有層好滑、好重奶油香嘅bechamel cream，絕對係一大點綴，令到千層闊麵冇咁乾身得嚟層次仲豐富咗。闊麵中嘅牛肉都好有香味，係水準之作。

Steak

Set lunch嚟講呢個幾抵食，220安士左右嘅西冷扒，有前菜/湯/沙律三揀一，仲有款是日甜品。 塊扒係美國安格斯西冷扒，肉色粉嫩，帶有肉香，搭配幼身直薯條，絕對係一個豐富嘅午餐呀。

Insalata di Avocado, Pomodorini e cipolle- mixed salad, onions, cherry tomato & avocado with lime vinegar dressing

喜歡輕食嘅朋友仔嚟到一樣有得揀。呢個牛油果沙律加入洋蔥、番茄、青檸同醋等製作，甜酸配搭有致，輕盈清爽，作為前菜相當開胃。

Mano （觀塘）

Pizza最緊要就係夠脆底！位於觀塘嘅呢間西餐廳，餐牌選擇集中火力喺手工製作嘅薄餅同意粉上，批底鬆脆帶焦香，口感甚佳。餐廳採用開放式嘅廚房，加上時尚感嘅設計，營造出舒適自在嘅感覺。

NDUJA 意式辣肉腸薄餅

鍾意食辣嘅朋友仔，試返個NDUJA 意式辣肉腸薄餅就啱晒。香辣嘅來源唔止係香辣莎樂美腸，另外仲有辣肉腸醬，辣得有層次感。特別介紹下薄餅嘅醬汁，係選用咗喺火山地域栽種嘅聖馬札諾蕃茄製作，呢種番茄比起平時食開嗰啲更加甜美，加埋俄勒岡葉、馬蘇里拉芝士，使味道變得更豐富。

SEAFOOD海鮮香草茄醬薄餅

海鮮控，揀海鮮香草茄醬薄餅啦，無懸念呀。同樣都係以甜美嘅聖馬札諾蕃茄，混和忌廉調製醬汁，使各種海鮮食材更加鮮甜。呢個海鮮pizza好足料啊，有鮮蝦、魷魚、煙三文魚等，配埋意大利蕃茜同馬蘇里拉芝士，啖啖鹹香鮮甜，係滿足呢。

Lasagna 意式肉醬千層麵

製作千層麵都幾多功夫，尤其是連芝士白汁都係自家製作，加埋慢燴肉醬，再逐層逐層搽勻，先至可以得出啖啖均勻嘅味道。師傅特意選用咗兩種芝士，包括馬蘇里拉芝士同巴馬臣芝士，難怪芝味咁濃郁。而味道鮮甜嘅火山番茄，則有中和嘅作用，使整體即使味濃亦唔會過於油膩。

BANANA NUTELLA PIZZA香蕉紅桑子榛子朱古力醬薄餅

喺一間主打薄餅嘅餐廳，甜品都係pizza，一啲都唔過份啊。薄餅上放上意大利奶酪忌廉芝士醬同朱古力榛子醬，疊加香蕉片、棉花糖粒同紅桑子，放入焗爐，係想像得到嘅邪惡。但焗完出嚟嘅熱溶棉花糖同榛子醬，又香又吸引，味道濃甜，令人無法抵抗。

心動不如行動！有興趣就快啲約埋三五知己去嘆下美食！快啲bookmark定啦！

*以上圖片只供參考，所有食品以實物為準. 食品供應因餐廳而異