薛家燕學生莎莎與榛綦躋身《全民造星4》60強 培育跳唱男團Super Boy對撼MIRROR?

ViuTV《全民造星IV》有唔少唱得又跳得嘅精英，其中兩位「家燕學徒」莎莎與榛綦就已經成功躋身60強。薛家燕（家燕姐）接受媒體訪問時表示自己有留意旗下少女組合Honey Bees成員莎莎同榛綦都有參賽，雖然仲未有時間睇返佢哋嘅演出，但就記得佢兩個各有賣點。

家燕姐認為莎莎係一個好乖嘅女仔：「佢跟過我哋去好多地方表演，跳舞特別勁，演戲都好好，因為夠放，我都同佢講過可以向演戲方面發展。」至於榛綦，家燕姐就話佢自細練聲，跳舞勁又靚女。其實除咗莎莎同榛綦，Honey Bees一直以嚟都培育出唔少人才，就好似前CLC成員莊錠欣（Elkie）、《全民造星III》殿軍雲浩影（Cloud）以及《聲夢傳奇》鍾柔美等等；家燕姐指，由於自己童星嗰陣無太多嘢學，所以十幾年前成立家燕媽媽藝術中心，希望從小培養一啲全能歌手，就好似Honey Bees成員一定要識唱、跳同演戲。

而家燕姐亦表示正栽培緊一隊跳唱男團Super Boy，仲話佢哋排練咗好耐，唱跳都好出色；被問到Super Boy會唔會對撼MIRROR，家燕姐就話會向MIRROR借鏡學習，因為演藝圈始終需要唔同嘅人才。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！