藍奕邦讚《大叔的愛》批評大台 數下TVB近年負面同志角色設定

可以話係香港第一套BL劇嘅《大叔的愛》今晚大結局，唔少人讚劇情好笑演員有表現，而舊年有份參與多元性向(LGBT+）音樂會嘅藍奕邦，亦都發長文分享對套劇嘅睇法。阿邦認為《大叔的愛》對佢有多一層意義，因為劇集將男男愛情「present得自然舒服，感覺就是跟異性戀愛無異」，甚至話「係我呢一輩嘅人等咗好耐先等到嘅奇蹟」。

藍奕邦亦都用TVB對LGBT角色嘅定型作對照，「大家都見識過TVB點樣喺電視劇入面present LGBT群組架啦。Gay一定係乸型嘅，trans一定係變態殺手，同性關係一定係『有問題』無好下場」。到底係咪真？

娘娘腔／扮基 例子︰蘇基－《巴不得媽媽》

阿邦篇文都有以「蘇基之類嘅騎呢image」做例子，的確TVB劇又真係經常將「娘娘腔」等同於同志。2012年嘅《巴不得媽媽》入面古明華演camp味濃又姿整嘅蘇基成功突圍，仲拎埋最佳男配角，但講咗咁耐原來蘇基唔係gay，最後仲同戲中嘅「姥姥」（溫裕虹飾）拍拖！呢種「扮基實直」嘅設定都可以話係另一種負面形象：當同志直情唔存在，講到尾都係直嘅！《My盛Lady》嘅許紹雄同阮兆祥都係由呢招。

殺人犯 例子︰《八卦神探》

呢套劇示範咗典型TVB劇「同志－心理有問題－殺人」嘅角色設計，仲要2單案都係咁！其中一單校園兇案，兇手石翹（成年版由周寶霖飾演）因為童年被性侵而憎恨男人兼成為女同志，仲因為癡戀女編劇而出手殺人；另一條線就係由趙希洛飾演變性人，年青時本來係男同志，因為被虐待而燒死親戚一家，後來走去整容變性再連殺多人！

暗戀直男無好結果 例子︰《珠光寶氣》

《大叔的愛》演KK嘅黃德斌喺2008年嘅《珠光寶氣》已經演過男同志Sunny，仲暗戀高長勝（林保怡）。但係同志嘅角設似乎只係用嚟交代點解Sunny會同高長勝稱兄道弟，冇啦！呢類收得好埋嘅同志，多數都係鍾意直男，但一定唔會開花結果。同類例子仲有《潛行狙擊》嘅沈震軒，又係收收埋埋嘅同志，冇任何立體啲嘅描寫，最後又係冇好結果。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！