藝人變機師再轉行 李傑志Brian開速遞公司「希望搵兩餐」

幾個月前TVB舉行《衝上雲霄大選》，希望吸納因為受疫情而被裁員嘅航空業人員。其中一名參加者李傑志(Brian)多年前係男團Square成員，後來轉行考入航空公司做機師，點知一場疫症令佢成為失業大軍。不過Brian好快就搵到窿路，除咗做返老本行，間中有幕前工作，而家仲宣布搞速遞公司。

Brian喺個人Instagram 出post，講笑話「本著『細個唔讀書，大個做運輸』嘅精神，小弟同幾個師兄弟開左間叫龍仔速遞嘅小型速遞公司，希望搵兩餐之餘，仲可以保育翻龍仔個牌頭」。龍仔，即係以前工作嘅航空公司。

而Brian嘅公司主要做食材嘅運輸，剛過去嘅新年就幫三間餐廳送咗幾百個盤菜同近千底年糕，亦都有運凍肉、蛋糕等等，嚟緊都會開始運埋寵物食糧。Brian明白好多同行都搵緊出路，所以決定只要係機組人員開嘅網店，都保證將件貨安全穩妥咁送俾個客，又會用優惠價錢，用冷凍車幫客人做即日運到嘅速遞服務。

之前Brian喺YAHOO TV 《Mean傾》節目分享機師工作體驗，試過喺機上遇到一場相識嘅周柏豪，同佢傾咗兩句，點知事後竟然收到警告。Brian又話當年為咗考入航空公司，用咗過百萬去紐西蘭考私人飛機牌，當中大部份開支係燃油費。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！