處男作拜神 獲老闆打氣 姜濤要驗身:心理生理都有壓力

始終不是Edan和AL,姜濤和柳應廷做的手勢明顯欠缺默契。
始終不是Edan和AL,姜濤和柳應廷做的手勢明顯欠缺默契。

人氣王姜濤日前暈倒後火速復工,昨精神奕奕地出席處男電影開鏡儀式,搞笑指「打籃球能醫百病」,又解釋自己心理和生理都有點壓力。回復體力的他四出拍下其他人「醜怪樣」,前輩毛舜筠隨即反擊:「我都有嘢喺手嘅!」

姜濤、柳應廷(Jer)及毛舜筠等昨午現身沙田出席英皇新片《阿媽有咗第二個》開鏡拜神,此乃姜濤日前出席活動暈倒後,首次公開現身,除吸引大批粉絲到場打氣支持外,英皇集團主席楊受成亦親身「主持大局」及問候姜濤,場面熱鬧。

瞓唔着打波減壓

姜濤事後聯同Jer、毛舜筠及導演彭秀慧接受訪問,見他精神狀態不錯,問到身體是否已無大礙?他說:「好番嘞。(畀人影到你去打籃球喎!)係第二日嘅事嚟嘅,呢排太少時間同朋友喺埋一齊,打波係我嘅減壓方式。暈倒後我瞓咗好耐,夜晚瞓唔着,又難得有一日假,所以咪去打吓波囉。(會唔會去做身體檢查?)遲啲會嘞,有打算。」

Jer坦言當日見姜濤暈倒在其身旁即嚇一跳:「佢身體好弱,我成日叫佢食多啲嘢,希望日後做多啲運動啦!」毛舜筠也表示當日正在開工,睇片知道姜濤暈倒亦相當憂心,姜濤聞言靦腆說:「我係生理加心理都有啲壓力,完全唔關劇組事嘅。」Jer接口:「毛姐好好,經常同我哋分享佢以前類似嘅經驗。」

毛舜筠有嘢揸手

毛舜筠過往拍劇亦試過3日3夜不眠不休,她說:「當時我後生,呢啲嘢真係冇辦法,一定要頂硬上,只可以爭取時間休息,同食多啲嘢囉!其實佢兩個(姜濤及Jer)盡晒力嘞。(姜濤影人瞓覺相喎!)我都有嘢喺手嘅,導演日日化晒妝返嚟片場,搞到大家都唔好意思瞌眼瞓。」

另外,Jer與姜濤即將舉行音樂會,問到有否足夠時間綵排?Jer謂:「我拍埋今日煞科,之後就綵排。」姜濤則表示自己尚有兩天戲份,加上音樂會大部分環節已綵排,僅欠少許舞步,對屆時的演出頗有信心。

眾人拜神切燒豬,期望電影拍攝順利和票房理想。
眾人拜神切燒豬,期望電影拍攝順利和票房理想。