行山友一個舉動令發哥罕有黑面 網民：尊重都唔識

熱愛行山嘅周潤發（發哥）一向貼地又親民，所以對行山友嘅合照要求總係有求必應，大方任合影絕無托手踭，唔少人喺成功捕獲野生發哥後都會上載與發哥selfie嘅相到網上晒命，等其他人「葡萄」一下。近日有位行山友上載與發哥嘅合照，不過發哥嘅表情睇落同平時好唔同，好似有少少唔耐煩。喺其他網民追問下，原來呢行山友做咗一個舉動，令到發哥有咁樣嘅反應。

話說呢位行山友最近去咗飛鵝山行山，期間好幸運地野生捕獲到發哥，之後就將合照放上網。一班網民除咗羨慕之外，仲察覺到發哥嘅招牌笑容消失咗。之後呢位行山友就話自己落緊山，而發哥就同一班朋友跑緊上山，於是佢就跑上去喺側面影發哥，佢就估自己有啲阻住佢。原來發哥係同方中信等人去跑山，方中信就帶頭跑，而發哥就包尾。唔少網民指發哥黑面，呢位行山友再話雖然發哥黑面，不過佢有望鏡頭已經令佢好開心。

唔少網民都睇唔過眼，紛紛留言譴責佢，例如「老X鳳要同你影相呀」、「嬲你唔知，話你唔好意思。」、「未見過發哥咁樣影相喎你都有啲問題」、「唔好打擾人啦真係」、「樓主都幾厚皮 自己都覺得阻住人都要影仲要po上嚟威 終於見識到咩係面皮厚 仲要人哋個樣都唔想影 身邊朋友影親都係發哥揸機笑得好開心 好心啦 尊重下啦」、「尊重都唔識⋯⋯」及「影之前有無問過發哥？基本禮貌你懂嗎？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！