街訪民意︳MIRROR大戰TVB千禧五虎 邊隊多人識多人撐？

今年電視圈好熱鬧，ViuTV旗下組合MIRROR 同ERROR人氣大盛，MIRROR演唱會一票難求，片段喺IG瘋狂洗版，《ERROR自肥企劃》晚晚都引起熱烈討論。大台TVB就搵曾志偉做高層，帶挈王祖藍成為首席創意官，大改革綜藝節目不過效果平平。有傳TVB力捧5位潛力男藝員組成「千禧五虎」，到底年青人心目中，五虎定係鏡仔多人識多人撐？兩個台嘅選秀節目邊個好睇啲？YAHOO TV節目《娛樂問呢啲》同你問真啲。

成日有人話大台有「入屋優勢」，小角色都有人識，但係街訪入面，普遍後生仔女都叫唔出千禧五虎五個人名，最多人識嘅係周嘉洛，不過都有絲打叫咗佢做「何嘉洛」。畢竟《愛．回家之開心速遞》係大台最高收視劇集，「安仔」多人識唔出奇！

咁MIRROR呢？有人可以數晒12個成員咩名，不過唔係人人做得到，但都起碼認得係MIRROR。而受訪者一面倒撐MIRROR多過千禧五虎，靚仔後生以外，有人認為仲叫五虎「outdate晒，思維唔同」。最好笑有中學雞話「2隊都唔想睇」，咁佢想睇咩？「好似楊千嬅咁風騷我咪鍾意囉」！！

TVB嘅《聲夢傳奇》同VIU嘅《全民造星》形式相似，大家又鍾意睇邊個節目多啲？2個節目都有人留意，只係睇完《聲》嘅都係鬧居多，有人話有參加者（冼靖峰）唱《櫻花樹下》唱得好難聽，亦有人睇完嫌悶。反觀《全》就比較多人讚，認為好笑、主持強尼識帶動氣氛、參賽者背後故事好睇等等。

照咁睇，VIU藝人同節目都多人留意，點解大台收視高咁多？會唔會睇嘅，都有返咁上下年紀？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！