衝破年齡界限 日本62歲婦嫁37歲夫獲網民祝福

愛情係唔係可以突破年齡嘅界限呢？最近日本就有一對年齡相差25歲嘅夫婦Aki與Yoshitaka，成功打動日本網民嘅心，佢哋嘅相識過程及結局喺網絡掀起熱話。

隨住時代進步，保養得宜嘅美魔女外表及身上都睇唔出歲月痕跡，簡直顛覆大家嘅既定印象。Aki同Yoshitaka嘅相識經過真係非常特別，當時29歲嘅Yoshitaka啱啱同前妻離婚，心情低落嘅佢就去咗Aki任職嘅居酒屋與朋友喝酒談心，Yoshitaka一見到55歲Aki就俾佢嘅外貌吸引住，仲暗自驚歎「呢個世界居然有咁靚嘅人」，不過Aki掛住工作，未有留意到Yoshitaka。一星期後Yoshitaka獨自再去居酒屋，而今次終於可以同Aki對話，二人仲傾得相當投契。之後Yoshitaka不時去居酒屋搵Aki，之後佢哋慢慢熟絡，並開始進一步交往。當時Aki聲稱自己係44歲（其實已經55歲），不過Yoshitaka就未有察覺，Aki一直製造機會令Yoshitaka發現佢嘅真實年齡，可惜Yoshitaka搞笑地未有發現，因此佢喺拍拖7年時向男方坦白，說出自己嘅真實年齡。雖然Yoshitaka知道後好驚訝，不過佢就表示唔介意，仲話法國總統馬克龍同妻子都相差24歲。

去到今年2月，佢哋決定結婚，更選擇駕駛露營車環遊日本度蜜月，佢哋仲將旅行甜蜜點滴及趣事拍成短片，上載到個人影片頻道「25歳逆年の差夫婦」同網民分享，之後佢哋仲登上綜藝節目，獲得大批網民支持及祝福。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！