袁偉豪唔想兒子袁咕碌大個似自己 坦言性格太「直」冇朋友

袁偉豪與張寶兒於6月初分享超聲波照，宣布袁氏家庭再添加一名新成員，袁偉豪表示：「爸爸會繼續努力」。雖然袁偉豪近年於TVB出鏡率大幅減少，坦言近5年基本上維持一年一套或兩年一套劇集，但就積極投身音樂創作之上；亦因工作量減少而擁有更多時間陪伴家人，親自照顧兒子「袁咕碌」袁晞祐（Hayven）。日前，袁偉豪與張寶兒拍片分享日常，袁偉豪表示唔想袁咕碌長大後似自己。

袁偉豪於片中笑到見牙唔見眼咁提到，袁咕碌為佢親手製作父親節禮物。之後就表示希望袁咕碌長大後做一個有原則嘅人，做事有始有終及要用功等等。而最不想袁咕碌學到自己嘅「直」，續指唔想囝囝冇朋友：「我成日覺得我個人咁直呢，其實真係唔係咁差，的而且確如果咁直呢，就冇乜朋友，所以我唔想我個仔冇朋友。」張寶兒安慰袁偉豪：「你咁真誠嘅時候，你身邊都係真嘅好好朋友。」

袁偉豪曾指自己性格硬頸，不時會出聲發表看法，例如與張寶兒結婚時因女方家境富裕，令袁偉豪備受輿論壓力，又被指婚後大走樣變醜男。當時，袁偉豪就直言自己睇到報道感到唔開心及唔舒服，仲反博網民：「講真，咁層樓我唔使供呀咩？我都要搵錢，我都要keep好個樣出嚟，點知又被你班人話面膠、醜男」。另外，袁偉豪曾於2021年林盛斌（Bob）及麥玲玲主持嘅節目《Master's Talk》（師傅有請）自爆曾遇過一個問米婆婆指佢前世得罪人，因此出道頭10年事業毫無起色，及後喺對方指點下，口中唸住對方姓氏叩頭道歉1000次，事業運逐漸轉好。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！