袁偉豪張寶兒 7,000萬聯名築愛巢

東方日報
·3 分鐘文章
袁偉豪與張寶兒聯名購入傲瀧一個花園複式單位。
袁偉豪與張寶兒聯名購入傲瀧一個花園複式單位。

藝人袁偉豪(Ben)與女友張寶兒於「疫」市入貨,聯名買花園複式戶豪宅以及車位,豪擲共約7,000萬!二人更是以首置入市只需付279萬印花稅,正好為生日的Ben迎來一份大禮;而另一半寶兒則冧爆指愛巢不菲亦不及自己無價!

39歲的袁偉豪(Ben)與28歲的張寶兒因拍攝無綫節目《打工捱世界2》撻着,拍拖3年非常甜蜜,期間不時傳出好事近,惟一直只聞樓梯響。Ben雖然未有實際行動,但原來二人已聯名買樓,為結婚做足準備!

據土地註冊處資料顯示,Ben與寶兒以首置聯名形式,斥資6,568.3萬元買入清水灣豪宅新盤傲瀧一個花園複式單位,實用面積2,205平方呎,連568平方呎私人花園,呎價近3萬!同時再以400萬買入兩個車位,總數為愛巢使了約7,000萬!而寶兒早於2017年已購入同盤一個細單位,並於早前以買入價轉讓給母親,連同妹妹張寶欣亦於該屋苑擁有單位,可謂齊齊做鄰居。而寶兒轉讓單位後回復首置身份,所以今次僅需付279萬印花稅,還有可付一成首期、即約660萬便可「上車」,尾數樓價則可4年後才繳付。

笑稱冇晒錢結婚

對於豪築愛巢一事,Ben表示新居尚未決定如何運用:「係畀大家將來用,當一齊投資,自住又好投資又好,係一個開始。(係咪要更加努力搵錢?)一定要,有個目標。愛唔愛巢就睇大家點睇。(幾時好日子?)有好消息會通知大家。」適逢昨日他生日,加上榮升業主,絕對是雙喜臨門!而寶兒昨日於電視城開工,對於買樓消息曝光撞正男友生日,她說:「咁啱啫,都未收樓。(一齊買樓好事近?)係一齊投資,已經用晒啲錢,冇錢結婚囉!不過投資同感情係兩件事,買樓係想畀自己一個目標,令工作更有動力。(唔自住?)要再商榷。(Ben講過話舊年娶你喎!)唔知喎!可能計劃不似預期。」及後她再接受電話訪問,表示為新居的確揼本:「唔係一個人就畀到,大家都要努力搵錢,畀大家未來有個目標。(下半生交畀袁偉豪?)個單位雖然價值不菲,但我先係無價!」

「友誼小姐」家境富裕

參選2016年港姐奪得「友誼小姐」的寶兒出身富裕家庭,父親從事內衣生意,家住禮頓山豪宅,有指張父至少擁有7個單位、房產值逾3億,難怪今次寶兒入市,出手一點也不低,看來張父亦有以實際行動支持愛女置業。至於Ben與寶兒今次進駐的屋苑,被喻為明星樓盤,周柏豪、視帝王浩信、劉愷威、關智斌等也持有單位,連已故「六嬸」方逸華,生前曾大手筆斥資逾1.3億連掃6個單位。

張寶兒現身開工認置業。
張寶兒現身開工認置業。