被指「嫁畀張寶兒唔使做」袁偉豪唔介意做弱者

阿Bob主持嘅J2清談節目《人夫放假約出去滾》最新一集搵袁偉豪(Ben)做嘉賓。袁偉豪同家境富裕嘅張寶兒由拍拖到結婚都惹來閒言閒語，袁偉豪直認要用好多時間解開呢個鬱結。

袁偉豪話公開婚訊後收到好多負評，甚至有人話佢「嫁畀張寶兒唔使做」，令佢覺得呢一行唔再需要佢。好在Ben享受婚姻生活，因為心靈上搵到依靠，可以喺老婆面前做弱者甚至詐嬌，佢仲話「聽老婆話，有乜咁難啫？」。袁偉豪又大讚老婆有學識，而且做決定時夠果斷。

17歲入行 冇戲拍乜都撈

袁偉豪喺訪問中提到自己入行廿幾年，原來佢中學時期就參加Yes!雜誌校草選舉，17歲正式入行，拍過維他奶廣告，仲同謝霆鋒拍電影《新古惑仔之少年激鬥篇》，新人嚟講機會唔少。不過後來人氣無以為繼，幕前工作越來越少，Ben一邊等機會一邊做其他工搵食，做過人體模特兒、佈置工、拍婚禮錄像、私人教練甚至市場推廣。眼見入行一段日子，2007年Ben決定參加TVB嘅《香港先生選舉》，諗住選唔到都有機會入電視台，結果大熱勝出。

因為有幕前經驗，入TVB之後好快就有劇拍，2011年更加有十套劇出街。2016年嘅《城寨英雄》「牙佬」一角，令袁偉豪喺萬千星輝頒獎典禮獲得「最受歡迎電視男角色」，仲喺新加坡同馬來西亞嘅TVB頒獎禮得獎，慢慢爬上一線。

港姐殺手 同岑杏賢3年情玩完 再撻著張寶兒

感情方面袁偉豪同港姐幾有緣。有傳06年佢同落選港姐邱詠恩拍拖，甚至有咀嘴相流出，但Ben否認戀情。後來又有報導話曾經力追胡定欣不果，之後喺另一套劇同林夏薇戲假情真，但係好快玩完。2010年參演舞台劇《我不要被你記住》時，袁偉豪同女演員馬沛詩擦出愛火，Ben亦都公開關係，甚至去到談婚論嫁階段，但係最終都係結唔成。

2013年袁偉豪同港姐岑杏賢交往，同樣有公開戀情，又係講到會結婚，不過拍拖3年後分手收場。當時岑杏賢喺IG出post暗示因為感情裡面得唔到信任同安全感，袁偉豪之後亦承認二人分手。袁偉豪喺《兩個小生去camping》提到，同岑杏賢分手後情緒低落，拍《使徒行者2》時經常搵黃翠如傾訴。

殊不知單身未夠一年，袁偉豪去非洲拍《打工捱世界II》同港姐張寶兒(Bowie)撻著。Ben話Bowie參選時話自己捱得，於是揀佢參與節目，坐車嘅時候以短訊攻勢追女成功。

呢段關係雖然惹來唔少非議，但係總算修成正果。2019年佢地喺加拿大旅行時，袁偉豪求婚成功，前年11月註冊結婚，婚前2個人以聯名形式買入西貢明星屋苑傲瀧2200呎複式單位，連埋2個車位一共7000萬。有傳家境不俗嘅張寶兒得到家人幫助，豪擲4000萬首期當嫁妝！為咗買愛巢，張寶兒以「轉名」形式將本來持有的同屋苑細單位轉名俾媽咪，咁就可以同袁偉豪以「首置」名義買大屋，即慳700萬稅！

舊年袁偉豪曾被網民喪踩外表老化驚人。嬲嬲嘅Ben喺社交平台發長文還擊，解釋當日不在狀態，仲話「繼續話我食軟飯，繼續話我去做鴨，繼續話我一味靠黐，繼續話我做戲好屎，你們的負面批評只會讓我繼續努力去做好自己！」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！