袁偉豪趕唔切救駕 譚俊彥深夜遇襲 打到瞓低

·2 分鐘文章
譚俊彥攞定架生自保!
譚俊彥攞定架生自保!

藝人譚俊彥被冼灝英「襲擊」至雙雙倒地,打鬥聲鏗鏘,期間出動多種「殺人武器」,認真嚇壞旁人!他又透露日前於深水埗更試過被人拖入後巷狂毆,場面緊張刺激!

譚俊彥(Shaun)不但長相與「456」李政宰相像,就連拍劇亦同樣「好揪得」﹗日前他為主演劇集《廉政行動2022》拍攝煞科戲,深夜時分於筲箕灣船廠一帶開工,交代他深入虎穴拘捕罪犯,拍檔袁偉豪因遇路障未能及時營救,奸角冼灝英趁機出動鐵錘及電鋸等「武器之首」還擊,單打獨鬥的Shaun即奮力頑抗,結果打到雙雙倒地,一地狼藉,場面緊張刺激。

談到今次「強敵當前」,Shaun說:「希望盡量少用替身,所以我買齊晒裝備,好似護墊咁,保護自己減少受傷。我知道對手係冼師傅(冼灝英)就冇咁驚,事關佢好有經驗,搵個新人同我對打嘅話,對方仲驚過我,我就真係驚喇!」

被拖入後巷打

據悉,今次劇集拍足半年,打鬥、槍戰連場,Shaun與袁偉豪等多次遇上挑戰。談到最深刻一場戲,Shaun表示於深水埗取景:「嗰場交代打爆咗車廂,有人大力扯我出嚟,然後打到入後巷。今次可以話係大製作,似足電影嘅拍攝模式,有時拍返嚟嘅嘢最終覺得唔啱用,寧願掟晒唔要再拍過。」

Shaun與袁偉豪表示今次合作令大家培養出默契,等開工不時打開心窗交流:「男人的浪漫,傾吓我哋啲郁得嘅玩具(車),同埋講吓家庭啦、婚後男人嘅轉變等等,幾開心嘅。」刻下每日僅得數小時休息的袁偉豪,視沖咖啡拉花為減壓良方,每朝早都會親手「整番杯」,且計劃稍後時間許可的話,會正式報讀相關課程增值。

冼灝英出動鐵錘,譚俊彥即時出腳反擊。
冼灝英出動鐵錘,譚俊彥即時出腳反擊。
譚俊彥打到倒地,難怪要買定護墊以減少受傷!
譚俊彥打到倒地,難怪要買定護墊以減少受傷!
袁偉豪為劇集拍攝煞科戲。
袁偉豪為劇集拍攝煞科戲。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能