【袁彌明】同樂易玲狹路相逢 因為一句「你咩名話」辣著?
美國星期二舉行大選,全球關注特朗普能否喺民調數字落後情況下反敗為勝。今日外媒BBC訪問多個亞州地方人民對大選睇法,當中搵嚟曾經參政嘅前港姐袁彌明(Erica)代表香港人,佢就話希望特朗普連任成功。
早排袁彌明同屋企人接受港台《鏗鏘集》訪問,由佢屋企各成員唔同嘅政見,刻劃今時今日唔少家庭都面對緊嘅問題,向來敢言嘅Erica喺節目直言好憎阿嫂容海恩所屬嘅新民黨。早前袁彌明亦喺YAHOO TV《娛樂訪談》爆料,講起同TVB高層「狹路相逢」嘅經歷。
話說訪問提到離開TVB13年嘅袁彌明同電視台舊同事冇咩聯絡,最多係同同屆港姐隔一兩年聚一聚。記者問佢有冇見過高層樂易玲,Erica立即上身,講起呢位口中「當日困我喺間房要我簽約嗰個咪佢囉」嘅「前經理人」。當年TVB想同袁彌明簽長約,Erica想拎份約同屋企人商量,不過在場嘅樂小姐話唔可以將合約拎出辦公室!結果Erica拒絕簽約,之後被投閒置散。
點知幾年後喺大型教會活動之上,袁彌明同樂小姐碰面,樂小姐話要介紹當日主講牧師俾Erica識,但係言詞有骨。「佢話『介紹我地公司以前嘅同事演員俾你……(問袁彌明)你叫咩名話?」,嬲到袁彌明咁多年之後都爆seed鬧爆。「呢啲人唔見好過見……你話晒都係上一輩,駛唔駛咁對我?仲要係去教會活動,乜聖經教你咁樣嘅咩?」