袁氏這一家︳容海恩姑仔 叛逆港姐袁彌明 床照被流出 同大台反面 從商殺出血路

立法會議員容海恩今日登報宣布,同家翁袁弓夷脫離「爺媳關係」,成為政界熱話。港台節目《鏗鏘集》曾經以前港姐袁彌明(Erica)一家為題材,講述喺當今政治風氣之下,各有不同政見嘅一家人,點樣面對彼此間嘅矛盾。畢竟袁彌明自己、佢家姐袁彌望、爸爸袁弓夷以至哥哥袁彌昌,政治立場都係唔同程度嘅「黃」,但係阿嫂容海恩偏偏係建制派立法會議員,所以一家人有晒默契,見面盡量避談政治。不過呢個計時炸彈終於要爆。

曾經從政嘅袁彌明,喺節目直接話好憎阿嫂所屬嘅新民黨。Erica即使只係喺娛樂圈活躍一段時間,敢言嘅性格依然印象深刻。

袁彌明讀緊書已經入行做model,17歲嗰年拍過陳曉東同梁詠琪主演嘅《初戀無限Touch》,之後去咗美國讀書,畢業之後回港,入過電訊盈科做見習經理(manegement trainee)。2005年,同袁彌明份屬大學同學嘅女歌手陳苑淇叫佢參選港姐仲做埋提名人,Erica當係攞吓經驗而參加,入圍之餘仲打入五強。一如其他港姐,袁彌明選完已經簽TVB港姐合約,仲好快就安排佢做主持同拍劇。

2006年,袁彌明同舊愛Terence一輯床照曝光,Erica話大受打擊,但係相信並非男方放相,而係第三者所為。

入行2年之後,袁彌明同TVB關係惡化,原因係Erica認為之前簽落嘅合約對藝人極不公平,而且公司冇俾時間佢考慮,雙方最終都係解約收場,之後Erica多次公開批評TVB。

脫離大台之後,袁彌明寫專欄做網台節目之餘,仲拍片教扮靚,可以話係第一代KOL。美妝產品介紹打出名堂,2009年袁彌明開設「袁彌明生活百貨」,並喺2018年成為上市公司。

搞生意之外,袁彌明都涉足政界,2012年同陳志全(慢必)宣布參選立法會選舉,2013年成為人民力量主席,至2016年辭任。袁彌明同老公林雨陽係因為網台政治節目而認識,2014年底結婚。現時袁彌明喺香港同溫哥華兩邊生活,形容自己係「太空人」。

【相關搜尋】袁彌明寸陳志雲

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能