被古仔小齊當沙包 林峯被輪毆 仲要跳埋樓!

·2 分鐘文章
小齊(左)大讚林峯為打戲不停操練,非常努力!
小齊(左)大讚林峯為打戲不停操練,非常努力!

影帝古天樂昨日出席新片開鏡,預告當中打到好甘,連拍5日打戲,大多親身上陣!林峯亦謂會被人打到飛起,動作戲更是飛天遁地!

古天樂昨日與寰亞集團主席林建岳、洪金寶、林峯、任賢齊、黃德斌等人,到屏山為新戲《九龍城寨.圍城》開鏡拜神。古仔透露新戲打得甘,連續打足5日,今次很多年輕演員特地為打戲訓練,大家都親身上陣:「除咗有啲高難度動作搵替身,我入面啲動作好似旋風咁快。(難到你?)OK啦!因為都有少少武打拍攝經驗。」電影亦特地搭建80年代的九龍城寨景,他開心地說:「入面全部啲雜誌、電視都係80年代,係我細細個睇嘅電視,幾懷舊。」

幾乎練到嘔

小齊則表示首次與林峯合作,大讚對方努力,為打戲不停操練,一星期操足5日。林峯預告今次會被人打到飛起:「畀小齊、古仔輪流打,基本上每個角色都會打我,今次有拳腳打、撞車、跳樓,飛天遁地。」又坦言事前訓練了個幾月,第一日訓練時更差些練到嘔。講到電影拍到農曆新年後,兩人未能與家人過年,林峯提起囡囡即冧爆謂惟有每日視像:「依家個女歲幾,掛住老婆又掛住小朋友。(個女咁耐冇見你唔認得你?)唔會,一見到我就叫爸爸,冧到幾辛苦都冇所謂。」

而洪金寶亦有打戲,問到可會吃力?他坦言:「有少少。(點打動你?)畀錢我咪得。」問到可有與近日捲入桃色風波的好友譚詠麟聯絡?他說:「少啲,因為我啱啱喺上海返嚟。(知道佢嘅新聞?)少少啦!」問到信不信?他愈講愈勞氣:「我唔知呀!網上好多嘢唔信得,好多人話我1949年出世,又用另外一個女人嘅相話係我前妻,又話我會老,咁唔通講嗰個人就唔會老咩?因為佢好快就會『釘』,所以咪唔會老。」

另外,譚詠麟早前有份參與的內地音樂節目《時光音樂會》如常播出他的片段,明顯未有受到傳聞所影響。事件擾攘多日,昨日他終於首度開腔,在社交平台發文表示:「時光音樂會是一個令人感覺舒適的音樂節目,每次拍攝都帶畀我們好多不一樣的回憶。」見他正專心地忙着為音樂會的Postcard簽名,忙得不可開交,心情沒有半點影響。

古天樂坦言為新片親身上陣,連續打足5日。
古天樂坦言為新片親身上陣,連續打足5日。
古天樂與林建岳及洪金寶等人為新戲開鏡拜神。
古天樂與林建岳及洪金寶等人為新戲開鏡拜神。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能