【被嫌TVB味濃】ViuTV《熟女強人》今首播 呢班無綫前藝人倒戈助陣

·6 分鐘文章
《熟女強人》
《熟女強人》

ViuTV新劇《熟女強人》今晚隆重首播,劇情以現代女性寫實心態做題材,透過7位女主角探討現今女性所面對嘅難題,包括「雪卵」、「爭撫養權」、「同性戀」、「性上癮」、「換妻」、「爸爸去哪兒」及「脫單」。劇集未出街已經令人非常期待,除咗因為主題貼地又有共鳴之外,演員卡士亦非常強勁,當中有唔少仲係前無綫演員倒戈助陣,不如而家就同大家睇下有邊幾位啦!

曾樂彤、陸詩韻、吳千語、胡杏兒、吳家麗、何佩瑜及沈卓盈
曾樂彤、陸詩韻、吳千語、胡杏兒、吳家麗、何佩瑜及沈卓盈

胡杏兒
胡杏兒喺1999年參選港姐奪得季軍入行,加入無綫後隨即備受力捧,多年嚟有唔少經典角色,2011年憑《萬凰之王》飾演孝慎皇后首奪視后。無綫當家花旦之一嘅胡杏兒喺2015年7月約滿離巢,與無綫結束16年賓主關係。離巢後胡杏兒集中喺內地發展,2018年更自組工作室。好耐冇拍港劇嘅胡杏兒,喺今年倒戈參與ViuTV劇集《熟女強人》拍攝,佢喺劇中飾演臨床心理學家及性治療師鄒靜,與舞台劇男演員大康(朱栢康飾)結婚後育有一女。原本家庭好幸福美滿嘅佢,有一日發現老公有外遇,於是佢決定離婚並爭囡囡嘅撫養權。

胡杏兒(《熟女強人》劇照)
胡杏兒(《熟女強人》劇照)

吳家麗
吳家麗喺1981年投考無綫第十期藝員訓練班,畢業後佢參演過唔少無綫劇集。直至80年代尾,吳家麗轉戰電影圈,多年嚟參與過無數電影,當中喺1993年憑《郎心如鐵》奪得金馬獎最佳女主角,及2000年憑《流星語》奪得香港電影金像獎最佳女配角。除咗幕前工作之外,近年佢亦有擔任幕後工作,好似喺2015年首次執導電影《花街柳巷》。回歸視壇嘅吳家麗,今次喺劇中飾演人稱教主嘅魏辰晞,佢喺十幾年前係名模,之後轉戰商界成為珠寶設計師,亦係一位人生導師,成立「歡迎光臨」會為閨蜜們解決疑難。事業心重嘅教主,佢選擇唔拍拖寧願去雪卵。喺雪卵期限就到嘅時候,佢就好想搵一個真命天子,同時被黃錦燊、黃愷傑兩父子及張松枝猛力追求。

吳家麗(《熟女強人》劇照)
吳家麗(《熟女強人》劇照)

沈卓盈
人稱「沈大師」嘅沈卓盈(Jess),喺2002年參加「《TVB周刊》Cover Girl選舉」奪冠後入行。佢喺無綫多年嚟參與過唔少劇集及綜藝節目拍攝,當中最令人深刻嘅一定係喺劇集《古靈精探B》跳鋼管舞嘅Icy姐姐,不過佢喺2018年年底與無綫16年結束賓主關係。回復自由身嘅佢,間唔中都有出席品牌活動,今年就重回電視框與觀眾見面。佢喺《熟女強人》中飾演財經分析師馮曉華,一直單身嘅佢,有一日突然被上司認為佢工作能力下降,原因係荷爾蒙失調。為咗解決呢個問題,上司叫佢搵一個男人去刺激下荷爾蒙,佢偏偏選擇上網搵兼職男友。有愛情滋潤後,馮曉華嘅工作真係回復水準,但佢發現自己已經愛上咗呢個付費愛情對象Jamie(駱振偉飾)。

沈卓盈(《熟女強人》劇照)
沈卓盈(《熟女強人》劇照)

陸詩韻
陸詩韻(Sharon)喺2005年參選港姐奪得亞軍入行,加入無綫後參與過劇集及綜藝節目拍攝,2009年選擇離開無綫並淡出幕前。轉戰商界做女強人嘅Sharon,除咗跟家人學做生意及創立自家設計嘅內衣品牌等等之外,最近佢仲獨自創立護膚品牌。2018年陸詩韻以部頭形式回巢為劇集《宮心計2深宮計》飾演宋王妃一角,雖然戲份唔多,不過依然令觀眾印象深刻。今次佢喺《熟女強人》飾演紅酒商家許嘉怡,佢一直被誤會係當年搶走鄒靜男朋友嘅第三者,導致多年針鋒相對。不過估唔到因為一次問題得到鄒靜解圍,令二人和好如初。雖然自己嘅友情解決到,但婚姻問題就解決唔到。佢同婦科醫生(劉浩龍飾)結婚多年,唔少人都認為佢哋好幸福,不過其實佢對老公已經開始失去性趣,所以令佢產生換妻念頭。

陸詩韻(《熟女強人》劇照)
陸詩韻(《熟女強人》劇照)

黃錦燊
黃錦燊(Melvin)喺70年代加入娛樂圈,參演過唔少劇集,最令人印象深刻嘅劇集《真情》飾演好姨(薛家燕飾)男友貓屎。黃錦燊喺讀書時期已經係學霸,入行後喺工餘時間修讀法律課程,喺1999年退跳出幕前,正式執業成為大律師。直至2018年,黃錦燊獲得《多功能老婆》監製陳寶華邀請,於是佢答應復出拍劇,同時向大律師公會申請除牌,結束20年大律師生涯。今次嘅《熟女強人》係佢同囝囝黃愷傑首次以父子檔拍劇,佢飾演成熟穩重嘅古董商人張祥,而囝囝就飾演健身教練楊思朗,佢哋將會一齊追求魏辰晞(吳家麗飾)。

黃錦燊(《熟女強人》劇照)
黃錦燊(《熟女強人》劇照)

張松枝
喺1995年加入無綫嘅張松枝,因經常喺劇集飾演二世祖或奸角,所以有「御用二世祖」嘅稱號。喺2012年,佢約滿無綫後轉投香港電視網絡,但可惜港視不獲發牌。之後,佢憑住個人實力獲得唔少演出機會,例如同周潤發拍電影、為唔同電視台劇集、網劇及去內地拍劇等等。喺今年,張松枝憑ViuTV穿越劇《二月廿九》飾演Yeesa(吳海昕飾)爸爸辰叔一角大獲好評,而今次佢喺《熟女強人》將會與黃錦燊及黃愷傑齊齊追求吳家麗。

張松枝(《熟女強人》劇照)
張松枝(《熟女強人》劇照)

吳忻熹
吳忻熹(原名吳文忻)喺1998年獲得港姐季軍後入行,星途一直浮浮沉沉,最為人熟悉嘅相信係2006年佢成為香港首位整形明星代言人。佢喺2011年下嫁有「南丫島王子」之稱嘅陳劍陵,婚後淡出娛樂圈專心照顧家庭。吳忻熹喺《熟女強人》將會客串兩集,劇中與彭敬慈演一對,會有換妻情節及激情內容嘅大膽演出。

吳忻熹
吳忻熹