被「舊愛」伍富橋翻Hurt 林穎彤婚前被飛爆喊

東方日報
·2 分鐘文章
林穎彤以為嫁得出,點知臨門一腳被「搶親」,陰功咯!
林穎彤以為嫁得出,點知臨門一腳被「搶親」,陰功咯!

「分手情侶」林穎彤(Bella)與伍富橋在新劇演情侶,後者最終情歸阮嘉敏,令她跪地痛哭,喊出3吋事業線!

無綫重拍經典劇《十月初五的月光》,日前林穎彤、伍富橋、阮嘉敏、羅天宇及胡鴻鈞等齊集開工,一對「舊情人」林穎彤與伍富橋演情侶之餘,更要拍結婚戲,可謂別有一番滋味!劇情交代政治婚姻之下,新娘被偷龍轉鳳,阮嘉敏成為最終「勝利者」,被遺棄的Bella慘爆跪地痛哭!

跑街冇咗忽肉

兩女不約而同穿低胸婚紗晒身材,Bella原來禾稈冚珍珠,為角色豁出去的她,穿高踭鞋在街上喪跑受傷,還跪地烏身爆喊,激罕晒出深長事業線,如此搏盡,相信已穩坐無綫小花之位。對於被讚身材好,她忍不住自誇:「呢件婚紗Cutting着到我好似有啲身材咁,哈哈!(同舊愛伍富橋拍呢啲場面,好深感受?)我哋係朋友啫!佢同嘉敏對手戲多啲,記得拍嗰時要着住高踭鞋跑,點知鞋踭篤到右腳,搞到流晒血,冇咗少少肉。」更指該場戲連拍兩日,加上要喪喊,情緒低落,完成後才放下心頭大石。

至於首次穿婚紗的嘉敏,笑言埋位前要節食:「件婚紗好緊,仲要飯後先拍,所以我只係食咗幾啖咋!好驚着唔落!場戲仲要同伍富橋Kiss,呢個係我螢幕初吻,真係好緊張,好在係蜻蜓點水。為咗呢個角色,我事前特登上戲劇班,亦有搵資深演員一齊研究劇本。」而伍富橋笑指支持自由戀愛,但就避談與Bella「結婚」的感受。

阮嘉敏成功「偷龍轉鳳」做新娘,與伍富橋拉埋天窗。
阮嘉敏成功「偷龍轉鳳」做新娘,與伍富橋拉埋天窗。