【視后家姐】睇見楊茜堯捱到有嚴重痛症 楊卓娜︰寧願受嗰個係我！

兩姊妹一齊喺同一間電視台工作，難免會被外界比較。楊卓娜入行先，亦憑《愛回家》為人熟悉，但係阿妹楊茜堯（楊怡）後發先至，成為視后級人馬，拍劇做女一走唔甩。楊卓娜早前接受Yahoo TV《娛樂訪談》訪問，講起姊妹關係講到喊晒口。

楊卓娜不違言妹妹發展比較好，家庭擔子由茜堯孭起，亦係楊卓娜上半生最大嘅安全網。楊爸爸早逝，兩姊妹同媽媽感情要好，無分彼此。楊卓娜早年有個自覺係「任性」嘅心願係開手工藝店，將興趣化為事業，茜堯二話不說拎血汗錢支持。

茜堯上位快，負面新聞自然多，身為家姐看在眼裡更加心痛。「只有我先知阿怡（茜堯）背後有幾大壓力，受過幾多嘅傷。身上嘅疤痕、工作上嘅傷，係會跟一世到老死。佢有嚴重痛症，都係累積返嚟……有時你睇覺得佢賺好多錢，但係你唔知佢用咗幾多錢睇醫生」。除此之外，仲有皮膚、心理上的問題、壓力等種種折磨，楊卓娜寧願幫茜堯受咗呢啲苦。

講起屋企事眼濕濕，楊卓娜話係因為感恩。苦盡甘來，兩姊妹喺家庭方面有好結果。楊卓娜正正因為開辦手工藝店，教小朋友做手工而認識而家嘅老公、人稱「廣告燈箱大王」嘅楊志翹，卓娜婚後誕下女兒舒然，同老公與病逝前妻所生嘅2個女組成一家五口。而楊茜堯同羅子溢（羅仲謙）嘅姊弟戀都修成正果，今年茜堯升級做媽咪誕下囡囡小珍珠。

「工作背後，最大嘅支柱始終係屋企」。講到底，事業比較無意義，最緊要都係「愛回家」。