視帝后初入行被恰 馬德鐘被搶角色 唐詩詠喊住死頂

視帝馬德鐘與視后唐詩詠，在娛樂圈努力多年才有今日成績，2人同聲表示曾經歷被「彈鐘」的日子，德鐘大爆當年做新人時，拍戲開工2日即遭易角，相當慘情！

馬德鐘、唐詩詠、王君馨及簡淑兒等昨日宣傳無綫劇集《我家無難事》，對於即將大結局，大家都感不捨。

唐詩詠透露日前到大學出席講座，與修讀演藝課的學生分享經驗，她說：「有個女仔好鍾意做戲，但去過好多次試鏡都失敗，問我點行落去？我話畀佢知，點唔得都要堅持。（有冇被拒絕過？）梗係有，同我講太瘦做唔到主角，又唔夠高，Challenge我好多嘢，但最重要係我真係好鍾意做戲，就算人哋點講，都要咬實牙關同喊住行落去，我性格係任性，唔得都要得！」

簡淑兒幫男友翻譯

馬德鐘亦有類似經歷，入行初期接拍鬼片，戲份等同男主角，怎料開工2日卻無故被換走：「我冇問點解，總之取替我嗰位好堅，所以咩都會發生。做呢行要堅持，唔好放棄。（之後有冇再同嗰位導演合作？）唔好講啦！（有冇喊？）唔開心一定有，難得差唔多係男主角，都係一個經歷，勉勵同學畀人拒絕唔重要，一次成功就得啦！」

而蜜運中的簡淑兒透露，男友麥大力將於下月開新劇，要抽空為他翻譯劇本，更笑說：「佢講中文好似粗口，所以我哋都係講番英文。呢排佢操緊肌肉，用咗個半月練成6舊腹肌，但佢想練8舊，當係35歲嘅一個目標。」