觀塘工廈新開溫馨小茶室 細味現泡精品茶飲配手工甜點

平時返工返學生活節奏急速，放假不如畀個空間自己休息下飲杯茶。觀塘區最近新開一間環境舒適悠閒、頗有屋企Feel嘅茶室，大家席地而坐特別放鬆。有唔同原片茶同調配茶畀大家選擇，可以近距離欣賞茶師泡茶之外，仲可以配搭唔同甜品，當中仲有純素選擇喔！

想爺爺了藏身於觀塘工業中心，除咗係一間茶室，亦會舉辦唔同嘅茶藝工作坊，例如調配茶、介紹六大茶類、茶類品茗入門等等，有興趣嘅話不妨留意下。選用茶葉嚟自世界各地，包括台灣、大陸、印度等等，原茶可以回沖，每一泡嘅風味都各有不同。

原茶有白茶、綠茶、烏龍、紅茶等唔同類別，茶師特別推介呢款炭焙白芽奇蘭烏龍畀平時飲慣咖啡嘅朋友，因為呢款茶唔單止帶炭焙香氣，仲帶啲類似可可嘅味道，口感柔順厚滑，有啲似手沖咖啡！

第一泡茶的確有可可香，味道甘甜。回沖後因為茶葉完全泡開，烏龍嘅茶香就更為突出，亦增加些微酸味。所以建議大家不妨預留多啲時間嚟品茶，細味當中嘅變化。

另一個入門推介係呢款小種紅茶，喺茶師沖茶嘅時候就可以聞到好似蜜桃咁甜甜酸酸嘅香味，入口先係微酸，之後係紅茶嘅醇厚甘香，兩種味道加埋一齊有啲似無咁酸無咁苦嘅無糖檸檬茶。口感比較薄但亦相當圓潤，尾韻甘醇。

除咗原茶另外仲有調茶同奶茶，好似呢款廢物老公拿鐵其實就係黑麥肉桂奶茶。黑麥係品牌特別向台灣原住民取貨，富含維他命B群，而且不含咖啡因。配搭肉桂獨特嘅辛香同牛奶嘅柔滑，相當順口又有特色。另一貼心點係玻璃杯預先雪好，再加用特別模具雪好嘅冰，融化速度較慢唔會影響到味道。

配茶嘅甜點嚟自上水Cafe ATMA，每個星期都會有唔同款式，部分仲會係素食或者純素！好似呢件純素檸檬吉士磅蛋糕口感不失綿密濕潤，配搭酸味自然嘅檸檬吉士，甜而不膩。

司康外層酥脆裡面鬆軟，食起嚟帶淡淡抹茶嘅清香，同橘皮嘅酸澀味，味道清新。

想爺爺了
地址：觀塘觀塘道436-484號觀塘工業中心二期8樓F2室

文、相：Cathy