觀眾好混亂 吳岱融情歌冧老婆 蔣天龍瘋狂鬧「臭雞」

吳岱融 早前在《巨輪II》飾演的「高天鷲」霸氣十足,令觀眾拍案叫絕,其中怒罵李佳芯「臭雞」一幕更成為網民心中經典!吳岱融在昨晚八點半播出《1+1的幸福》中,與結婚22年的太太鍾淑慧分享兩人的戀愛故事,更即場唱情歌冧太太!不過甜蜜過後,吳岱融在九點半《乘勝狙擊》大結局變番狂人(癲佬?)蔣天龍,繼續大奸大惡,仲狂鬧呂珊係「八婆」同「臭雞」,觀眾都忍唔住高呼:「媽呀!好亂呀!」

 

合唱放閃

吳岱融在劇情中霸氣十足、大奸大惡,呢日佢雖然都係以一身「鷲哥」造型上節目,不過架起眼鏡後就多了一份柔情,散發陣陣好老公的味道,難怪觀眾都話好唔慣!節目初先播出吳氏夫婦21年前的婚禮片段,可見吳岱融愈來愈Man,而鍾淑慧就無點變過,keep得勁好!之後兩公婆在台上合唱情歌〈只有情永在〉,唱完仲深情一吻!

永遠是初戀情人

究竟吳氏夫婦點解多年來都可以保持恩愛呢?吳岱融就話要保持一種心態,永遠都當對方係初戀情人,因為兩公婆結婚耐咗,可能會唔記得,變成習以為常!

「只要我一息尚存,我一定陪喺你身邊」

之後去到向太太講出真情心底話的環節,吳岱融即場唱出費玉清的〈一剪梅〉表愛意,感謝太太真心愛自己,唱完後再情深表白:「只要我一息尚存,我一定陪喺你身邊。I love you, dear!」太太鍾淑慧頓時哭成淚人!

不過當觀眾們都沉醉在吳岱融夫婦的浪漫之際,《乘勝狙擊》大結局緊接播出,吳岱融在劇中即時回復「本性」,大鬧呂珊係「臭雞」係「八婆」,小編睇到有啲混亂……

 

又係「臭雞」

昨晚大結局一集,講述吳岱融得知前妻陳秀珠和仇人單立文將結婚後大發雷霆,現任妻子呂珊上前慰問,點知吳岱融就即時火遮眼,打對方一巴後破口大罵:「你喺我心目中只係一隻臭雞!」呢句對白似乎似曾相識… 《巨輪II》嚟嘅喂!

血洗婚禮

去到單立文與陳秀珠婚禮當日,本來成個畫面相當溫馨,誰不知吳岱融突然殺到,用機關槍瘋狂掃射!結果單立文與陳秀珠雙雙中槍,倒臥在血泊中!

喪盡天良

大鬧婚禮後,吳岱融返到自己屋企避風頭,之後與追捕佢的陳展鵬扭鬥作一團,連親生仔都想殺!煎Pang媽媽呂珊護子心切,擋在煎Pang身上被吳岱融瘋狂地腳踢,兼瘋狂被鬧「八婆」!

成刀下亡魂

眼見司警就到,吳岱融打算由家中秘道逃走,但去路原來早已被呂珊封住!於是佢唯有用錘仔嘗試將水泥打爛,然後口裏繼續狂鬧「臭雞」!呢個時候,呂珊在吳岱融背後露出一個好陰森的表情……

鏡頭一轉,吳岱融突然停晒手放下錘仔,坐低緩緩講出:「我話你係雞啫,你咪鬼當自己係雞咪得囉。」講完隨即口吐鮮血倒地,原來佢已經被呂珊從後捅了一刀!

咁樣被鬧「臭雞」同「八婆」,仲想殺自己親生仔,呂珊呢個moment要爆啦!佢在吳岱融倒地後繼續不停狂插,唸唸有詞:「冇人可以殺我個仔…」睇到觀眾們都好心寒,大讚珊姐好戲!癲佬蔣天龍就係咁樣,慘死在亂刀之下,都可算大快人心?

全文完

圖片:TVB《1+1的幸福》、《乘勝狙擊》

延伸閱讀:

《親親我好媽》學生妹江嘉敏 清純脫俗獲激讚

被ViuTV嫌棄 林保怡操fit還拖

拜年變開年 醉Bob辣㷫謝安琪