解暑之選！4大雪花冰/刨冰推介 港式奶醬多+榴槤口味

呢排天氣真係好熱，絕對係食冰嘅大好機會！今期介紹4間好有人氣嘅雪花冰專門店同甜品小店畀大家，有排隊港式甜品店、日式雪花冰專門店、韓式cafe同港式糖水甜品舖，每間嘅冰各有特色，食完透心涼。

奶醬多+黑芝麻口味 甜姨姨私房甜品

好有口碑嘅人氣甜品店，刨冰系列係佢哋其中一個招牌，用上日本空運到港嘅冰磚同日本冰機，因為日本冰同本地製作嘅冰結冰點同水源唔同嘅關係，刨出嚟嘅冰一絲絲咁，口感綿密。口味方面都好有特色呀，如最人氣口味醬爆奶醬脆多，冰磚有三層，每一層都會加入花生奶同花生碎，面層再鋪上豆腐奶蓋及新鮮焗起嘅脆多士塊，再加上煉奶同花生醬，好香濃！鍾意水果口味，可以試下汪阿姐火龍果同留戀榴蓮豆腐花，都好有驚喜～

人氣日式冰品店 Shari Shari Kakigori House 氷屋

由日本人主理嘅刨冰專門店，選用純淨日本水，配上新鮮水果及自家製糖漿，好幼滑！口味方面都偏向日式少少，如抹茶忌廉焦糖、焙茶黃豆粉忌廉味及日式豆腐黃豆粉味等。推介抹茶忌廉焦糖，抹茶味好香濃，面層嘅脆脆焦糖令味道澀中帶甜，口感又豐富啲。而焙茶黃豆粉忌廉味除咗茶香，更加多埋豆香，面頭嘅蕨餅口感Q彈，啱晒煙韌控。另外伯爵奶茶、芒果椰子及草莓special都值得一試。

韓式綿綿冰 Nun Desserts Cafe

旺角韓式cafe，供應多款韓式甜品，冰品一樣有超多口味～較少見有呢個韓式綠寶石香甜蜜瓜雪奶，鋪上大量香甜嘅蜜瓜，蜜瓜甜得嚟唔涸喉，中間嘅雪奶打得好細，牛奶亦好濃厚，如果想甜啲都可以自己加鍊奶。韓式特級香滑醉人草莓雪奶都好吸引，草莓大粒香甜又多汁，士多啤梨醬唔會太假，成個冰都好清新，上面仲有一塊芝士蛋糕作點綴添～

招牌菠多野結冰 糖宮甜品專門店

一間好多元化嘅糖水店，中式及西式嘅甜品都應有盡有。每逢夏天都有機會食到招牌菠多野結冰，即係挖空半個菠蘿然後將菠蘿雪花冰放喺入面，鮮菠蘿甜美多汁，而雪花冰亦充滿香濃菠蘿味道，食落酸酸甜甜好開胃。如果你係榴槤控，必試榴槤雪花冰，每一啖都係榴槤獨有香氣，齒頰留香。

文: Yanica