《解決師》正在熱播中 大家對佢有咩評價?

《解決師》劇照
《解決師》劇照

無綫台慶劇《解決師》搵嚟王浩信、唐詩詠、陳敏之、張頴康、馮盈盈及李天翔等人主演。劇集喺上星期開始播出,唔知大家又對佢有咩評價呢?

劇集雖然集合警匪同埋犯罪元素,不過就有唔少校園情節,講述王浩信同唐詩詠透過體育項目感化一班問題學生。咦!《點解阿Sir係呀sir》同《解決師》咁似嘅?《點解阿Sir係呀sir》就由陳豪同鍾嘉欣主演!兩套劇除咗呢段情節相似之外,仲有李天翔喺《解決師》就係龍頭大佬個仔,同樣李天翔喺《點解阿Sir係呀sir》入面又係社團第二把交椅喎!而且兩套劇嘅社團明知都係叫「進興」!

講開李天翔飾演龍頭大佬係羅樂林個仔,大家又覺得佢表現如何呢?網民就話李天翔做呢個黑社會太子入型入格,而且型到不得之了,比起主角王浩信有過之而無不及!

《解決師》劇照
《解決師》劇照

另外,龍頭大佬羅樂林,老戲骨不愧為老戲骨。羅樂林喺《愛.回家之開心速遞》入面飾演嘅大龍生已經深入民心。轉個頭喺《解決師》入面就飾演一個想金盆洗手嘅龍頭大佬。真係做乜角色羅樂林都冇問題!

《解決師》劇照
《解決師》劇照

而《解決師》入面飾演警察嘅李國麟就曾經當上臥底,潛伏喺羅樂林社團入面。但之後兩人竟然成為知心朋友,羅樂林每當有美食當前就會相約李國麟一齊「撐枱腳」!其中一段情節就係講述羅樂林有一條海上黃花魚,就相約李國麟分享!呢段情節入面羅樂林表示想退出社團嘅想法,繼而二人回味過往的遭遇。呢一段劇情印象令人深刻,戲味非常!

《解決師》劇照
《解決師》劇照

講返校園劇情方面,就真係有啲改善空間啦!王浩信被副校長莊思敏要求帶領學校欖球隊爭取名銜,之後王浩信就喺學校入面不斷招兵買馬。而係第一課操練嘅時候,王浩信只着重體能訓練令到一班學生苦不堪言。後來王浩信話如果你哋想有「掂波」嘅訓練,就先要打贏王浩信。最後王浩信以一打十一達陣成功⋯⋯!會唔會誇張咗少少呢?

《解決師》劇照
《解決師》劇照

另外,不時喺球隊練習時候出現嘅啦啦隊,呢班新人就真係要俾啲心機啦!佢哋嘅演技真係比較生硬,反而班男學生就自然得多!

《解決師》劇照
《解決師》劇照
《解決師》劇照
《解決師》劇照

不過有待《解決師》劇情較為深入之後,可能會比到大家更多驚喜!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能