【勁歌金曲】評Hana菊梓喬新歌被網民鬧冇資格 單立文係音樂人居然冇人知？

新一集《勁歌金曲》繼續由音樂人及觀眾對現身演唱嘅歌手作出評價，Hana菊梓喬演唱《逆天奇案》主題曲《秘密花園》，搖滾曲風同之前嘅劇集歌有所不同，普遍評價都幾正面。不過評審之一單立文（豹哥）一開口就話「坦白講，真係唔rock，係一隻幾普通下嘅歌」。豹哥仲話大家對Rock有誤解，唔係一種包裝或者「隊band大聲啲」就係搖滾，又認為Hana唱得劇集歌多可能係致命傷。

有網民就話「豹哥樂壇地位一向唔高，都係葡萄人地最受歡迎女歌手」。咦，原來真係有人唔知豹哥唔止係一個演員……

節目入面豹哥都話自己由70年代開始玩Rock，睇翻資料，豹哥由中學時代已經蒲唱片鋪兼學結他，中學未畢業就開始夾band，仲要係喺灣仔酒吧演出，真係「食過夜粥」！80年代開始豹哥嘅樂隊加入樂壇，其中一隊叫Chyna，成員包括人稱「香港鼓王」嘅已故鼓手Donald Ashley，作品Within You’ll Remain仲被多次改編，其中一個版本由徐小鳳主唱。後來Chyna解散，豹哥同黃良昇及蘇德華組成另一隊band Blue Jeans，但係3年後解散。

夾Band以外，單立文亦係香港知名演唱會樂隊低音結他手，24歲就為許冠傑首個紅館show做樂手，豹哥亦係陳奕迅Eason's Moving On Stage World Tour樂隊領班，另外佢亦係側田、衛蘭、古巨基嘅演唱會樂隊成員，當然仲有李思捷《今晚睇李》嘅現場樂隊Palwerful Band都係由豹哥帶隊。而喺2018年，豹哥聯同恭碩良、黃貫中、夏韶聲及鄧建明一齊演出《搖滾大俠奏》音樂會。

豹哥唔止彈得，仲會作曲編曲同監製，黎明、周慧敏、李克勤同陳慧琳都唱過佢嘅歌，而1997年豹哥為初出道嘅胡蓓蔚製作歌曲，因此擦出愛火花，拍拖12年後結婚。

呢份資歷，夠晒資格評Hana啦啩？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！