誤將公款放入碎紙機 OL用一個月時間砌好11張銀紙
返工一個唔小心，後果可以好大鑊。
不過聽過老闆級人物講，除非件事太大單，否則佢唔太介意啲同事做錯嘢。
因為呢啲時候就見真章！
點樣拆、點樣兜、點補救，先係一個同事最彰顯實力嘅時間。
阿老細仲話可以順便睇埋個同事嘅主管，係幫手救水定及時寧蓆，
一眼就睇得出，一箭雙雕。
韓國有位OL，一時大意將一筆公款嘅銀紙，放咗入碎紙機。
筆錢話多唔多，55萬韓圜，換轉港幣大約3600蚊左右。
最直接嘅方法，好多人都會揞荷包賠錢算。
呢位OL呢？就決定捨易取難，將呢11張銀紙砌返好！
11張銀紙碎到好似菜絲沙律咁，
而當地銀行有規定，損毀銀紙要回復原貌8成先可以拎去換返錢。
於是OL姐姐每日收工就開行turbo玩puzzle……
佢仲因為咁，搞到膊頭酸痛要黐撒隆巴x，眼又攰要滴眼藥水。
個幾月後，佢終於砌好11張銀紙，甚至比起銀行嘅要求更勁，還原9成。
老細見到OL咁盡力，仲話請食飯添。
唔知香港最大粒、呢期瀨大嘢嘅打工仔，又會點砌返好呢壇嘢？