調教你MIRROR︳Ian被Fans一句擊中 花姐原來當Edan陪襯唔打算捧

第3集《調教你MIRROR》正式進入「調教」Mode，由花姐講出對各個成員嘅睇法，同埋希望梁祖堯（阿祖）點幫佢地。第一個出場係Ian（陳卓賢）。

花姐認為Ian將好多感受收埋，唔開心會坐埋一邊，令人有距離感，仲話同Ian嘅爭執次數僅次於直腸直肚嘅Anson Kong，所以想佢打開個心。而阿祖就回帶講返喺碼頭集合當日，導演問遲到嘅Ian住喺邊，Ian黑面話「唔講啦」，令阿祖覺得Ian好識保護自己。

阿祖安排阿Jer 同Ian去麵包店學整包，而店主正正係Ian Fans 阿Kit。Kit見到偶像當然開心，但係講起對Ian印象就好直接咁話「比以前chok咗……同埋冇以前咁開心」。

Ian都承認冇以前咁開心，認為參加《全民造星》冇咩包袱，做咗藝人公私事都成為焦點，反而令佢更唔敢嘗試，越來越收埋自己，亦唔想解釋外界對佢嘅誤解，於是變得更自我保護，要打開個心就更難。

另一個要調教嘅係呢半年人氣急升嘅Edan，原來當日花姐簽佢嗰陣講明只係當Edan係陪襯，Edan都照答應，仲話明白自己跳舞唱歌外表都唔及其他人，但係慢慢行總會有日被人睇到，呢種心態令花姐好欣賞。花姐希望Edan被調教嘅都唔算大問題，只係想佢可以更接受他人。

而Edan喺訪問都保持呢種正面態度，認為冇MIRROR佢地甚麼都不是，而且有個宗旨MIRROR係大家嘅根，而且覺得MIRROR越來越好，唔想就咁完結。

節目下半場都安排姜濤、Anson Lo同埋Edan三個「地獄廚神」煮味餸俾隊友食，本來阿祖提議整豉油雞，但係三個仔認為太易，於是改為整咕嚕雞球，仲要係成隻雞起骨拆肉整！見到Edan斬雞雞手鴨腳，而平時陰聲細氣嘅姜濤就嗌住指揮大局，估唔到製成品幾見得人！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！